Þrátt fyrir ungan aldur hafa hjónin Guðbjörg Hrefna Árna­dóttir og Einar Örn Adolfs­son mátt ganga í gegnum þyngri raunir en flestir þurfa að þola um ævina. Dóttir þeirra, Anja Mist, fædd­ist sextán vikum fyrir tím­ann síð­ast­liðið haust og var ekki hugað líf fyrstu vik­urnar. Í tutt­ugu vikna sónar var ungu for­eldr­unum ráð­lagt af læknum að enda með­göng­una því allt benti til þess að dóttir þeirra hefði alvar­legan litn­ing­argalla. Eftir að fjöl­skyldan hafði engst sundur og saman í tvær og hálfa viku kom hins vegar í ljós að Anja Mist er alheil­brigð.

Einar Örn ótt­ast hins vegar að hann missi af fyrstu árum dóttur sinnar en hann var síð­asta haust dæmdur í sex ára fang­elsi fyrir eit­ur­lyfja­inn­flutn­ing. Brotið framdi hann þegar hann var sautján ára og í mik­illi óreglu. Ungur ald­urs Einars var ekki tek­inn til greina við ákvörðun refs­ingar og þá var það ekki metið til refsi­lækk­unar að hann hefur nú, þremur árum eftir að brotið var framið, snúið við blað­inu og stofnað fjöl­skyldu.

Tekinn með 30 þúsund e-töflur

Guðbjörg og Einar hafa þekkst frá því þau voru í grunn­skóla, raunar voru þau í sama bekk. „Ég var reyndar ekki skot­inn í henni þegar við vorum lítil, en ég varð skot­inn í henni þegar ég var sautján ára,“ við­ur­kennir Einar og brosir stríðn­is­lega til eig­in­konu sinnar.

Eins og áður segir var Einar hins vegar í mik­illi óreglu á þeim tíma og því ent­ist sam­bandið stutt í fyrstu atrennu. Í ágúst árið 2011 var Einar Örn staddur á tón­leikum í Gauta­borg þegar hann fékk örlaga­ríkt sím­tal. Hann var búinn að vera í mik­illi neyslu og skuld­aði víða pen­inga. Hann þáði því boð um að minnka skuld­irnar með því að flytja inn eitt kíló af kóka­íni til lands­ins. Þegar Einar var síðan hand­tek­inn við kom­una til Íslands fund­ust hins vegar rúm­lega þrjá­tíu þús­und e-töflur í fórum hans og sat hann í gæslu­varð­haldi í alls þrjá mán­uði. Rannsókn máls­ins dróst veru­lega og ekki var gefin út ákæra fyrr en í jan­úar árið 2014 – tveimur og hálfu ári eftir að brotið var framið. Þá hafði Einar Örn snúið við blað­inu, farið í með­ferð og hafið nýtt líf með Guð­björgu. Hann segir það því hafa verið mikið áfall þegar kveð­inn var upp dómur í maí síð­ast­liðnum þar sem hann var dæmdur til sex ára fang­els­is­vistar. Einar hefur áfrýjað mál­inu og von­ast til að fá mild­ari dóm hjá Hæsta­rétti. Enn er óvíst hvenær Hæsti­réttur tekur málið fyrir.