Halla Þórlaug Ósk­ars­dóttir, mynd­list­ar­kona og rit­höf­undur, hefur verið ráðin umsjón­ar­maður menn­ing­ar­þátt­ar­ins Víðsjár á Rás 1, ásamt Helga Snæ Sig­urðs­syni, og byrjar með dag­legan þátt í ágúst. Það var því ekki úr vegi að kom­ast að því hvaða kona það er sem leyn­ist á bak­við rödd­ina sem útvarps­hlust­endur munu kynn­ast í ágúst. Fyrsta spurn­ingin er ein­föld: Hver er Halla Þórlaug Ósk­ars­dóttir?

„Stelpa með stóra og gjarnan marg­þætta drauma. Ég kem úr fjöl­skyldu sem er góð blanda af verk­fræð­ingum og lista­mönnum og ég held að ég sé ein­hvers konar mixt­úra af þessu tvennu líka, alla­vega í anda. Hef lært þónokkuð af stærð­fræði, mynd­list og svo rit­list. Ég elska börn og dýr. Ég þoli ekki órétt­læti og feðra­veldið.“

Þú lærðir mynd­list í LHÍ og rit­list í HÍ, hvað kom til að þú ákvaðst að fara í útvarpið?

„Það er kannski það sem er mest lýsandi fyrir mig af öllu saman. Ég á mér drauma og set mér mark­mið en ég leyfi samt líf­inu svo­lítið að  „ger­ast“ bara. Ég sæki um allan fjand­ann, ef ég finn að hjartað slær þar, og ef það gengur upp þá held ég áfram í þá átt. Ég hef verið að pota í Rík­is­út­varpið und­an­farið, sýnt stofn­un­inni áhuga og starf­inu þar. Það spilar auð­vitað inn í að MA-verk­efni mitt var útvarps­leik­rit sem flutt var á RÚV í jan­úar á þessu ári. Samfara leik­rit­inu rann­sak­aði ég mið­il­inn og heill­að­ist af honum. Í raun er þetta alls ekk­ert furðu­legt fram­hald af mynd­list og rit­list. Þarna ertu að búa til myndir – hljóð­heim – fyrir hlust­and­ann. Þetta er svo áhuga­verð tækni, að kom­ast inn á svona per­sónu­legt svæði sem haus­inn á fólki er. Auk þess á þetta starf vel við mig, ég hef tengsl bæði inn í mynd­listar- og bók­mennta­heim­inn og umfjöllun um þessi efni verða meðal verk­efna minna í nýja starf­inu.“

Verða hlust­endur varir við mikla breyt­ingu með nýjum umsjón­ar­mönnum?

„Það eru ákveðnar breyt­ingar í vændum og ég vona auð­vitað að okkur tak­ist að vera lif­andi umsjón­ar­menn sem setjum mark okkar á þátt­inn – en mér finnst líka mik­il­vægt að sinna þeim dygga hlust­enda­hópi af natni sem fylgt hefur Víðsjá gegnum árin.“

Er ekk­ert ógn­vekj­andi að fylgja í fót­spor útvarps­goð­sagna eins og Eiríks Guð­munds­sonar?

„Haha! Jú, svo­lítið! En – eins og EM-stelp­urnar segja – maður á ekk­ert að bera virð­ingu fyrir svona stór­stjörnum. Maður kemst ekk­ert áfram á því.“

Og takið þið við Víð­sjánni 1. ágúst?

„Já, ég mæti í vinnu beint eftir versl­un­ar­manna­helgi, sem er 2. ágúst. Fyrsti þátt­ur­inn fer samt ekki í loftið fyrr en um miðjan ágúst.“

Og hvað ætlarðu að gera þangað til?

„Það er reyndar alveg fárán­lega mikið að gera hjá mér um þessar mundir því ég er að skrifa leik­verk ásamt Köru Hergils Valdi­mars­dóttur dans­ara og Hannesi Óla Ágústs­syni leik­ara, sem sýnt verður í Borg­ar­leik­hús­inu eftir ára­mót. Svo það mun reyna bæði á skipu­lags­hæfni mína og heraga í haust. En mér líður samt best þegar það er nóg að gera. Þetta ger­ist svona í bylgjum.“

Og þið verðið bara tvö með þátt­inn?

„Við verðum tvö sem stýrum þætt­inum en svo verða fleiri með innslög, pistla og fleira, eins og þekkst hefur í Víðsjá og sam­bæri­legum þáttum.“

Hvað hlakk­arðu mest til að takast á við í nýja starf­inu?

„Ég hlakka bara alveg ótrú­lega mikið til. Ég hlakka til að vinna með hljóð­heim­inn í útvarp­inu, ég hlakka til taka þátt í að móta þátt­inn svo­lítið eftir mínu höfði og kom­ast inn í höfuð hlust­end­anna. Ég hef rosa­lega mik­inn áhuga á útvarps­þáttum og er yfir­leitt með „podcöst“ í eyr­unum. Ég held það sé margt sem mætti bæta við í íslenskt útvarp og ég hlakka til að takast á við það, læra eitt­hvað nýtt og vinna með öllu þessu frá­bæra og inspírer­andi fólki sem nú þegar starfar á Rík­is­út­varp­inu.“