Sveinbjörg Birna Sveinbjörnsdóttir, oddviti Framsóknar og flugvallarvina í Reykjavík, skorar á alla þá sem boðist hafa til að hjálpa flóttamönnum á Facebook-hópnum Kæra Eygló að hjálpa einstaklingum og fjölskyldum á Íslandi sem eru á biðlista eftir stuðningi hjá borginni.

„Áskorun til allra þeirra sem skrifað hafa á Kæra Eygló hópinn. Í dag eru 500 einstaklingar og fjölskyldur á biðlista í Reykjavík eftir stuðningi þar sem þörf er á stuðningsfjölskyldum, liðveislu, tilsjón og fleira. Þeir sem vilja virkja kærleikann og hjartahlýjuna strax geta boðið sig fram í það verkefni og afsalað sér endurgjaldi fyrir. Það geri ég hér og nú,“ skrifar Sveinbjörg á Facebook. Undanfarna daga hefur fjöldi fólks lýst yfir vilja til að hýsa og aðstoða nauðstatt fólk sem flúið hefur yfir Miðjarðarhafið í leit að hæli í Evrópu. Sveinbjörg vekur athygli á íslenskum fjölskyldum í neyð en studdi einnig tillögu borgarstjórnar.

„Í dag eru 500 einstaklingar og fjölskyldur
á biðlista í Reykjavík eftir stuðningi“

Á fundi borgarstjórnar í dag var rætt um tillögu þess efnis að Reykjavíkurborg bjóðist til að leggja sitt af mörkum við að taka á móti flóttafólki. Allir stjórnmálaflokkar með fulltrúa í borgarstjórn stóðu á bak við tillöguna en engu að síður gagnrýndu tveir borgarfulltrúar minnihlutans hana.

Tillagan hljóðar svo: Borgarstjórn samþykkir að óska eftir viðræðum við ríkisvaldið um hlutverk og aðkomu borgarinnar að móttöku flóttafólks og lýsir sig reiðubúna til að leggja sitt af mörkum til að tryggja sem flestum öruggt skjól. Borgarstjóra er falið að hefja viðræðurnar, upplýsa borgarráð um framgang þeirra á meðan á viðræðunum stendur og leggja svo fram útfærða, tímasetta og kostnaðarmetna áætlun þegar niðurstaða liggur fyrir. 

Segir meirihlutann ekki einu sinni ráða við grunnþjónustuna

Kjartan Magnússon og Áslaug Friðriksdóttir, fulltrúar Sjálfstæðisflokksins, telja borgarstjórnarmeirihlutann á villigötum og sat Kjartan hjá í atkvæðagreiðslu um málið. Sagði hann borgarstjórnarmeirihlutann vilja fá sinn skerf af athyglinni sem velvilji Íslendinga gagnvart flóttafólki hefur vakið. Telur Áslaug „ógeðslega illa“ staðið að forgangsröðun í fjármálum Reykjavíkurborgar og beindir sjónum, rétt eins og Sveinbjörg Birna, að biðlistum hjá borginni. Halldór Halldórsson, oddviti sjálfstæðismanna í borgarstjórn, lýsti yfir stuðningi við tillöguna. Var hún samþykkt um fjögurleytið með fjórtán atkvæðum en Kjartan Magnússon sat hjá. Bæði Sveinbjörg Birna og Áslaug Friðriksdóttir greiddu atkvæði með henni.

Áslaug Friðriksdóttir

„Þrátt fyrir að ég styðji tillöguna fannst mér ég þurfa að benda á að mjög ótrúverðugt væri að hlusta á borgarfulltrúa meirihlutans setja upp geislabaugana og tala um hversu mikið þeir vilji hjálpa og aðstoða flóttamenn,“ segir Áslaug Friðriksdóttir í samtali við Stundina. „Staða fjármála í Reykjavík sýnir að þau geta engu lofað, því þau ráða ekki við að reka grunnþjónustu eins og stuðningsþjónustu við fatlaða. Hvernig ætla þau þá að taka við enn fleiri flóttamönnum?“

Sveinbjörg Birna

Mynd: Framsókn og flugvallarvinir / Facebook

„Ég vona að við finnum sameiginlega lausn“

Sveinbjörg Birna er óánægð með frétt Vísis um yfirlýsingar sínar. Í stöðuuppfærslu á Facebook skrifar hún: „Ég geri þá kröfu að mér séu ekki lögð orð í munn eða gerðar upp tilfinningar. Það er miður að blaðamaðurinn sé að gera mér upp tilfinningar um að mér hafi verið órótt undir umræðu um flóttamenn þessa helgi. Mér var fullkunnugt um að það væri áhætta að fara upp í ræðustól í borgarstjórn í dag og ræða málin, en ég gerði það samt. Ég talaði um náungakærleik, um hjálpfýsi og hjartahlýju Íslendinga, ég talaði um kristin gildi, ég talaði um að við virðum mannslifið umfram allt annað og látum okkur þykja vænt um náungann. Ég talaði um að við þurfum að horfa til einstaklinga, barna og fjölskyldna. Að við þurfum að horfa til velferðarmála, kostnaðar, húsnæðismála og áskorun sveitafélaga, ríkisins og frjálsra félagasamtaka um að finna leiðir. Ég talaði um að stjórnmálaflokkar þyrftu allir að marka sér ítarlega stefnu í innflytjendamálum, því málefnið sé ekki að yfirgefa okkur þó svo að við hjálpum fólki. Ég hvatti fólk til að virkja strax kærleikann og aðstoða fjölskyldur (sem eru bæði íslenskar og erlendar) sem þurfa stuðning við hjá Velferðarsviði Reykjavikur og ég endaði ræðuna mína á tilvísun úr Spámanninum þar sem segir " Til eru þeir sem gefa lítið af næktum sínum og þeir gefa til að láta þakka sér og hin dulda ósk þeirra eitrar gjöfina" - þeir taka það til sín sem eiga það, en ég vona að við finnum sameiginlega lausn á vandanum til heilla fyrir land og þjóð.“