Undirskriftarsöfnun hefur verið sett af stað þar sem forseti Íslands er hvattur til að vísa væntanlegum lögum um úthlutun makrílkvóta til þjóðarinnar.

Sigurður Ingi Jóhannsson hefur lagt fram frumvarp á Alþingi þar sem ráðgert er að úthluta aflahlutdeildum til sex ára, samkvæmt aflahlutdeild skipa á árunum 2011-2014. Í frumvarpinu segir meðal annars að óheimilt sé að fella aflahlutdeild úr gildi, að hluta eða öllu leyti, með minna en sex ára fyrirvara. Sex ára gildistími aflahlutdeilda framlengist síðan sjálfkrafa um eitt ár í senn hafi þessi ákvæði ekki verið breytt fyrir 1. janúar ár hvert. Þá verður heimilt að flytja kvóta til á milli skipa innan sömu útgerðar. Um gríðarlega hagsmuni er að ræða, enda hafa tekjur útgerðarfélaga vegna makríls verið um og yfir 20 milljarðar króna á ári undanfarin ár.

„Verði frumvarpið að lögum er útgerðinni í fyrsta sinn veitt óafturkallanlegt forræði yfir afla­heimildum til lengri tíma en eins árs.“

Þessu mótmælir hópurinn sem stendur að undirskriftarsöfnuninni á þeim forsendum að þetta feli í sér grundvallarbreytingu á tilhögun fiskveiðistjórnunarkerfisins. „Verði frumvarpið að lögum er útgerðinni í fyrsta sinn veitt óafturkallanlegt forræði yfir afla­heimildum til lengri tíma en eins árs og Alþingi getur í reynd ekki afturkallað þá ráð­stöfun. Um leið leggja stjórnvöld til að veiðigjöld verði ákveðin til þriggja ára sem aftur bindur hendur Alþingis fram yfir næstu kosningar.

Lagasetning af þessu tagi kemur í veg fyrir að unnt sé að kveða á um skilyrðislaust eignar­hald þjóðarinnar á fiskveiðiauðlindinni með ákvæði í stjórnarskrá sem jafnframt tryggi að þjóðin njóti fulls gjalds af afnotum á auðlindinni,“ segir í yfirlýsingu frá hópnum.

Skora á forsetann 

Skora á forsetann Hópurinn skorar á forseta Íslands að vísa lögum til þjóðaratkvæðagreiðslu.

Þar segir einnig að ef fram fari sem horfi muni meirihluti Alþingis samþykkja umrætt frumvarp um nánast varanlega úthlutun makrílkvóta. Því hafi verið sett af stað undirskriftarsöfnun á þjóðareign.is þar sem forseti Íslands er hvattur til að vísa væntanlegum til þjóðarinnar svo hún fái að ákveða hvort fella skuli lögin úr gildi.

„Við undirrituð skorum á forseta Íslands að vísa í þjóðaratkvæðagreiðslu hverjum þeim lögum sem Alþingi samþykkir þar sem fiskveiðiauðlindum er ráðstafað til lengri tíma en eins árs á meðan ekkert ákvæði um þjóðareign á auðlindum hefur verið sett í stjórnarskrá og þjóðinni ekki verið tryggt fullt gjald fyrir afnot þeirra.“

Undir þetta skrifa Agnar K. Þorsteinsson, sérfræðingur í upplýsingatækni, Bolli Héðinsson, hagfræðingur, Elín Björg Ragnarsdóttir, fyrrverandi framkvæmdastjóri, Guðrún Pétursdóttir, lífeðlisfræðingur, Henný Hinz, hagfræðingur, Jón Sigurðsson, fyrrverandi skólastjóri Bifröst, Jón Steinsson, hagfræðingur og Þorkell Helgason, fyrrverandi prófessor.

Þingmaður hagnast á frumvarpinu

Páll Jóhann Sat í atvinnuveganefnd sem hafði frumvarpið til umfjöllunar og gæti hagnast persónulega á því.

Mynd: Framsóknarflokkurinn

Mikið hefur verið fjallað um umrætt frumvarp á undanförnum dögum. Fréttablaðið greindi frá því að Marver, útgerðarfélag í eigu eiginkonu Páls Jóhanns Pálssonar, þingmanns Framsóknarflokksins, fái úthlutað makrílkvóta að verðmæti 50 milljónir króna verði frumvarpið að lögum.

„Allt hennar er mitt og allt mitt er hennar.“

Áður en Páll Jóhann tók sæti á þingi skráði hann eignarhlut sinn í fyrirtækinu á eiginkonuna, en hann var áður framkvæmdastjóri og prókúruhafi þess. Í samtali við Stundina sagðist Páll Jóhann líta svo á að þrátt fyrir það ætti hann enn helming í fyrirtækinu í gegnum eiginkonu sína, þau ættu það saman. „Allt hennar er mitt og allt mitt er hennar,“ sagði Páll Jóhann.

Páll Jóhann situr í atvinnuveganefnd sem hefur haft frumvarpið til meðferðar og leit ekki svo á að hann væri vanhæfur til þess að fjalla um málið, vegna þekkingar sinnar á sjávarútvegi. Í kjölfar fréttaflutnings af málinu sagðist Páll Jóhann ekki ætla að greiða atkvæði um málið á þingi.