„Þetta hefur ekkert gengið, hreint ekki neitt,“ segir einstæð móðir og öryrki sem setti inn auglýsingu á Bland.is í morgun þar sem hún óskar eftir dósum og flöskum frá velviljuðum samborgurum. Ástæðan er sú að hún vill heimsækja veika móður sína sem býr í Bandaríkjunum.

„Ég er með flugmiða en er að safna fyrir gjaldeyri svo ég geti verið hjá móður minni í nokkrar vikur,“ segir hún í samtali við Stundina en móðir hennar fékk nýlega heilablóðfall og er lömuð öðrum megin á líkama. 

„Það var einhver neyð sem rak mig áfram. Ég vildi athuga hvort fólk lægi nokkuð á flöskum sem ég gæti sótt og tekið.“ Hún hefur ekki ákveðið hve löng dvölin verður. „Þetta fer allt eftir því hversu fljót mamma verður að ná sér.“