Ósammála Bjarna: Vill ljúka afgreiðslu fjárlaga fyrir kosningar vegna Dýrafjarðarganga

Ásmundur Einar Daðason, þing­flokks­for­maður Fram­sókn­ar­flokks­ins, telur að það liggi ekk­ert á að kjósa til Alþingis og vill að fjár­lög árs­ins 2017 verði afgreidd áður en næstu þing­kosn­ingar fara fram. Þetta kemur fram í pistli sem hann birtir á Eyjunni í kvöld. Pistill­inn fjallar um hve brýnt sé að ráð­ist verði í fram­kvæmdir vegna Dýra­fjarð­ar­ganga fyrir kosn­ingar. 

„Áður en kosn­ingum verður flýtt þá skulum við klára að afgreiða fjár­lög fyrir árið 2017 og tryggja þannig fjár­magn til verk­efn­is­ins á næsta ári,“ skrifar Ásmundur. Þetta er á skjön við þann skiln­ing sem lagður hefur verið í mál­flutn­ing Bjarna Bene­dikts­sonar, fjár­mála- og efna­hags­ráð­herra, á Alþingi. Til dæmis hefur því verið slegið upp í fyr­ir­sögn á Mbl.is að fjár­lög verði ekki afgreidd fyrir kosn­ingar.

Sem kunn­ugt er hafa Bjarni og Sigurður Ingi Jóhanns­son for­sæt­is­ráð­herra gefið fyr­ir­heit um að kosið verði í haust. Á fundi þeirra með full­trúum stjórn­ar­and­stöð­unnar fyrir helgi kom fram að stefnt væri að kosn­ingum í októ­ber. Oftast eru fjár­lög afgreidd út úr þing­inu seinni part­inn í des­em­ber. Ef hug­myndir Ásmundar eiga að sam­ræm­ast fyr­ir­heitum Bjarna og Sigurðar er hins vegar ljóst að ljúka þarf afgreiðslu fjár­laga fyrr en venjan er.