Ólafur Haukur Johnson, sem var eigandi og skólastjóri Menntaskólans Hraðbrautar, hefur haldið áfram að taka arð út úr rekstrarfélagi skólans og lána peninga út úr fyrirtækinu þrátt fyrir að skólanum hafi verið gert að endurgreiða menntamálaráðuneytinu ofgreidd fjárframlög sem námu 192 milljónum króna á árunum 2003 til 2009. Ólafur segist hafa fengið vilyrði Bjarna Benediktssonar fjármálaráðherra fyrir því að skólinn fengi áfram stuðning.
Menntaskólinn Hraðbraut var einkarekinn framhaldsskóli í Reykjavík sem starfaði á árunum 2003 til 2012. Þrátt fyrir skólinn hafi verið einkarekinn var hann fjármagnaður með opinberu fé að 80 prósent leyti og að 20 prósentum með skólagjöldum nemenda.
Skólanum lokað eftir fjáraustur úr honum
Skólanum var lokað eftir vormisseri árið 2012 í kjölfar umfjöllunar DV um tugmilljóna arðgreiðslur og lánveitingar út úr rekstri skólans og gagnrýninnar skýrslu Ríkisendurskoðunar á starfseminni.
Arðgreiðslur út úr Hraðbraut á tímabilinu 2003 til 2009 námu 82 milljónum króna en eigendur rekstrarfélags skólans eru Ólafur Haukur Johnson og eiginkona hans, Borghildur Pétursdóttir. Rekstrarfélag skólans gerði einnig leigusamning við fasteignafélag í eigu Ólafs Hauks um leigu á húsnæði undir skólann í Faxafeni í Reykjavík og tóku Ólafur og Borghildur 105 milljóna króna arð út úr því á árunum 2005 til 2008.
Samtals greiddi íslenska ríkið um 1152 milljónir króna til skólans á grundvelli þjónustusamnings á árunum 2003 til 2010. Skuld skólans við menntamálaráðuneytið, sem tilkomin var vegna ofgreiddra fjárframlaga og fjallað var um í skýrslu Ríkisendurskoðunar, var á endanum skuldajöfnuð á móti kröfu sem Hraðbraut átti á hendur íslenska ríkinu vegna þess að skólinn fékk of lítið greitt með hverjum nemanda á árunum 2010 til 2012. Hraðbraut er því skuldlaus við íslenska ríkið samkvæmt heimildum Stundarinnar.
DV greindi einnig meðal annars greint frá því að Ólafur Haukur byggi í einbýlishúsi á Arnarnesinu, ætti sumarhús á Flórída og keyrði um á svartri Range Rover-bifreið. Eitt af því sem Ólafur Haukur sagði um rekstur skólans á sínum tíma var að það sýndi sig að það „borgaði sig“ að reka skólann.
„Það er alveg nóg fyrir mig“
Ólafur fær ekki stuðning menntamálaráðuneytisins
Ólafur hefur á síðustu árum reynt að fá leyfi og stuðning menntamálaráðuneytisins til að opna skólann aftur en hvorki Katrín Jakobsdóttir, fyrrverandi menntamálaráðherra, né Illugi Gunnarsson, núverandi menntamálaráðherra, hafa orðið við þeim óskum hans.
Ólafur skólastjóri skrifaði grein í Fréttablaðið í gær þar sem hann átaldi Illuga fyrir að hafa ekki veitt honum leyfi til að opna skólann aftur með fjárveitingum frá ríkinu.
Ólafur vildi ekki ræða greinina í Fréttablaðinu í samtali við Stundina. „Heyrðu Ingi minn. Skrifa þú nú bara í fimmtánda skipti sömu greinabullið sem þú ert búinn að skrifa áður. Það er alveg nóg fyrir mig,“ sagði Ólafur áður en hann skellti á.
Einungis 114 þúsund krónur eftir í félaginu
Þrátt fyrir þá gagnrýni sem Ríkisendurskoðun hefur sett fram á rekstur Hraðbrautar greiddi Ólafur samt sex milljóna króna arð út úr rekstrarfélagi skólans, Hraðbraut ehf, árið 2012 og svo tólf milljóna arð árið 2013. Engin arðgreiðsla var árið 2014 en þá var hins vegar greitt út rúmlega sjö milljóna króna lán til „tengdra aðila“. Þetta kemur fram í ársreikningum rekstrarfélags skólans. Ólafur hefur því haldið áfram að greiða arð og veita lán út úr rekstrarfélaginu þrátt fyrir að megingagnrýni Ríkisendurskoðunar á starfsemi skólans hafi einmitt snúið að slíkum greiðslum út úr félaginu. Þetta lán bætist meðal annars við sextán milljóna króna lán út úr rekstrarfélaginu til tengdra aðila árið 2012 og tvö 50 milljóna króna lán í fasteignaverkefni Nýsis í Skotlandi á árunum 2007 en 2008 en Ólafur Haukur fjárfesti í því verkefni í gegnum annað fyrirtæki.
Í lok árs 2014 var lausafjárstaða félagsins orðin þannig að nánast ekkert fé var eftir í því: Einungis rúmlega 114 þúsund krónur. Í lok árs 2013 hafði handbært fé numið rúmlega 8,5 milljónum króna og var helsta ástæðan var breytingunni á handbæru fé sú að umrætt lán til tengdra aðila var veitt. Hraðbraut ehf. er ekki með neinar tekjur þar sem fjármagn félagsins kom frá nemendum Hraðbrautar ehf. og menntamálaráðuneytinu þegar skólinn var starfandi en hann hefur ekki verið starfræktur í bráðum fjögur ár. Því eru engar líkur á því að lausafjárstaða rekstrarfélags skólans hafi batnað eftir að gengið var frá ársreikningi skólans fyrir árið 2014.
Segir Bjarna styðja skólann - faðir hans var í varastjórn
Eitt af því sem vakti athygli í grein Ólafs Hauks í Fréttablaðinu var að hann vísaði í meint tveggja manna tal þeirra Illuga Gunnarssonar frá því í febrúar á þessu ári. Í því samtali, þar sem rætt var um að menntamálaráðuneytið myndi gera annan þjónustusamning við Menntaskólann Hraðbraut, sagði Ólafur að Illugi hefði sagt að ef Bjarni Benediktsson styddi opnun Hraðbrautar að nýju. „Þá lofaðir þú mér því að gera þjónustusamning við Hraðbraut ef við gætum fengið stuðning Bjarna Benediktssonar fjármálaráðherra við málið. Sá stuðningur hefur legið fyrir í nokkurn tíma en ekkert heyrist í þér vegna málsins og engin leið er að ná sambandi við þig. Nú spyr ég þig Illugi Gunnarsson: Ætlar þú að standa við loforð þitt um að gera þjónustusamning við Menntaskólann Hraðbraut svo hann geti tekið til starfa í haust? Hefur þú kjark til að fylgja grunngildum og stefnu Sjálfstæðisflokksins?“,“ sagði Ólafur Haukur og vísaði til meintra orðaskipta þeirra Illuga á fundinum.
„Sá stuðningur hefur legið fyrir í nokkurn tíma en ekkert heyrist í þér“
Hvað sem líður sanngildi orða Ólafs Hauks um skoðun Bjarna á skólanum þá sat faðir Bjarna, Benedikt Sveinsson, sem varamaður í stjórn skólans á árunum fyrir íslenska efnahagshrunið árið 2008. Bjarni er því tengdur skólanum óbeint í gegnum föður sinn.
Stundin hefur gert tilraunir til að ná tali af Svanhildi Hólm Valsdóttur, aðstoðarkonu Bjarna Benediktssonar fjármálaráðherra, en hún svarar ekki símtölum miðilsins. Þar af leiðandi er ekki hægt að fá það staðfest hvort Ólafur Haukur fari með rétt mál í grein sinni um skoðun Bjarna Benediktssonar á að Hraðbraut opni á nýjan leik eftir gerð þjónustusamnings við menntamálaráðuneytið.
Athugasemdir