Í hádeginu í dag fóru fram mótmæli fyrir utan Alþingishúsið þar sem mótmælt var að 888 dagar væru liðnir frá því að Alþingi samþykkti að rannsókn færi fram á einkavæðingu bankanna. Hópurinn krítaði 888 á götuna fyrir utan Alþingishúsið. Þessi gjörningur varð til þess að þingvörður fór út með slöngu og hóf að spúla gangstéttina og vöknuðu mótmælendur við það. Þessi sami þingvörður sneri einn mótmælanda niður, sem hafði afskipti af þingverðinum, með þeim afleiðingum að hann er blár og marinn. Myndband af þessu má sjá hér fyrir neðan.

Krotuðu í óleyfi

Maðurinn í leðurjakkanum er Sigurður Haraldsson öryggisvörður, sem var við mótmæli. „Þetta er mjög sérstök uppákoma, ég verð bara að segja það. Það að koma með brunaslöngu út af Alþingi og fara að sprauta á mótmælendur, það eitt er mjög alvarlegt mál. Við vorum þarna að mótmæla algjörlega friðsamlega, hann sagði okkur að vísu að við höfðum ekki leyfi til að krota þarna,“ segir Sigurður í samtal við Stundina.

„Við vorum þarna að mótmæla algjörlega friðsamlega“

Sigurður segir að þingvörðurinn sem spúlaði krítina hafi tekið sig „júdó-taki“ með þeim afleiðingum að hann féll í jörðina. „Málið er það að ég fór í slönguna þegar hann var kominn að seinna krotinu. Þá labba ég að honum og tók fyrir slönguna og beindi henni frá. Við það tekur hann mig einhverju júdó-taki þannig að ég dúndrast í götuna. Það að beita einhvern svona ofbeldi er algjörlega fyrir neðan allar hellur, velsæmisreglur og annað. Ég hef verið í ýmsu og lent í ýmsu, lögreglan hefur aldrei komið svona fram við mig,“ segir Sigurður.

Óforsvaranleg viðbrögð

Hann segir að það að hann hafi reynt að stoppa hann við að spúla krotið réttlæti ekki gjörðir þingvarðarins.

„Við vorum ekki að skvetta málningu eða koma fyrir sprengju.“

„Hann var að sprauta á okkur. Þetta er algjörlega óforsvaranlegt að nota svona varnarbrögð. Við vorum að kríta! Við vorum ekki að skvetta málningu eða koma fyrir sprengju. Við vorum ekki með einhver hárreyst læti. Þeir koma þarna eins og við séum einhverjir hryðjuverkamenn,“ segir Sigurður. 

Marinn á líkama og trefillinn ónýtur

Sigurður segist vera mjög illa farinn á líkamanum eftir að hafa verið snúinn niður af þingverði. „Mér líður mjög illa í skrokknum, ég er með einhverja marbletti. Ég verð að fara til læknis á morgun því ég get ekki fengið áverkavottorð í dag, því þessi sár koma ekki fram strax. Það er dálítið tak í vinstri síðu. Svo var ég með dálítinn verk í kjálka eftir það þegar hausinn á mér fór niður,“ segir Sigurður.

Hann bætir við að ekki nóg með að hann sé aumur á líkama þá séu föt hans líka skemmd. „Jakkinn minn er þónokkuð skemmdur, hann er marinn að aftan. Splunkunýr trefill sem ég var með er handónýtur. Hann er allur í kássu,“ segir Sigurður.