Danshöfundurinn Bára Sigfúsdóttir er búsett St. Gilles hverfinu í Brussel og hefur ákveðið að halda sig heima við í dag vegna hryðjuverkaárásanna í miðborginni í morgun.

Í morgun ollu fjölmargar sprengingar því að minnst 34 manns létu lífið í hryðjuverkaárásum á flugvelli og lestarstöð í Brussel, höfuðborg Belgíu, fyrr í dag. Tuttugu eru sagðir hafa látist á neðanjarðarlestarstöðinni og 14 á flugvellinum. Talið er að mun fleiri hafi særst alvarlega í árásunum.

Bára var sem betur fer ekki nálægt árásunum, en segist heyra mikið í sírenum í hverfinu. Þá segir hún skrítna stemmningu vera í borginni. „Maður er auðvitað mjög sleginn, eins og aðrir. Þetta ristir dýpra þegar að þetta er svona nálægt manni.“ 

„Lífið heldur áfram fyrir þá sem misstu ekki mikið í dag. En maður fær keim af því hvernig fólk hefur það annars staðar í heiminum, þar sem það er ekki er eins öruggt að búa eins og hefur verið hér í Evrópu fram til þessa,“ segir Bára. 

Hún hefur búið í Brussel síðastliðin átta ár. Hún segir þetta vera dásamlega borg og vonar að andinn í borginni haldist sá sami. En núna er ástandið „hræðilega sorglegt allt saman.“