Læknadeild Háskóla Íslands hefur ákveðið að óþarfi sé að fram fari óháð rannsókn á plastbarkamálinu innan háskólans. Þetta var niðurstaða fundar um málið sem haldinn var á miðvikudaginn í síðustu viku samkvæmt heimildum Stundarinnar. Skiptar skoðanir voru þó á fundinum um mikilvægi óháðrar rannsóknar en einhverjir af kennurunum við deildina töldu mikilvægt að fara þá leið á meðan aðrir töldu þetta óþarfi þar sem málið væri til rannsóknar í Svíþjóð. Læknadeildin ætlar því að bíða eftir niðurstöðum úr sænsku rannsóknunum sem orðnar eru allmargar en bæði Karolinska-háskólinn og Karolinska-sjúkrahúsið hafa ráðið óháða aðila til að rannsaka málið. Þá er plastbarkamálið til rannsóknar hjá lögreglunni í Stokkhólmi sem mögulegt sakamál sem snýst um mögulegt manndráp eða hugsanlega alvarlega líkamsárás. Tillaga um rannsókn á málinu var það eina sem rætt var um á fundinum hjá læknadeild Háskóla Íslands.