Ólafur Árnason fékk sitt fyrsta heilablóðfall árið 2007. Síðan hefur hann fengið tvö önnur, það síðasta fyrir rúmum tveimur mánuðum síðan. Ekki er vitað hvað veldur þessum þrálátu heilablóðföllum og kemst Ólafur ekki í fyrirhugaðar rannsóknir vegna verkfalla á Landspítalanum. Fyrir tæpum þrjátíu árum greindist Ólafur með lifrarbólgu C en nýlega komst hann að því að lyfin sem hann hefur tekið við sjúkdómnum eru hættuleg þeim sem fengið hafa heilablóðfall. Ekki fæst fjármagn fyrir nýjum lyfjum. „Ég bíð bara eftir að veikjast aftur, annað hvort fæ ég heilablóðfall eða veikist af lifrarbólgunni,“ segir Ólafur í samtali við Stundina. 

Kemst ekki í rannsóknir

Bíður eftir að veikjast aftur Ólafur Árnason fékk heilablóðfall fyrir tveimur mánuðum en hefur ekki ennþá fengið segulómun á skaðanum vegna verkfalls. Hann hefur ekki heldur ráð á lyfjunum sem hann þarf.

Verkfall geislafræðinga, lífeindafræðinga, náttúrufræðinga og ljósmæðra við Landspítala Íslands hefur nú staðið yfir í rúma tvo mánuði. Ekki er enn farið að sjá til lands í kjaradeilu BHM og hjúkrunarfræðinga við ríkið, en sem kunnugt er varð til að mynda ekkert af sáttanefndinni sem boðuð var fyrir helgi. 

„Vegna verkfallanna er ég á biðlista eftir því að komast í segulómun í heila, eftir heilablóðfallið sem ég fékk fyrr á árinu. Mér er sagt að hafa samband aftur eftir verkfallið. Ég er líka á biðlista eftir því að komast í rannsóknir á því hvers vegna ég er alltaf að fá þessi heilablóðföll,“ segir Ólafur. Eftir síðasta heilablóðfall tók við endurhæfingarmeðferð á dagdeild Grensás, en stuttu eftir að verkföll hófust var Ólafur sendur heim. Hann er því í engri endurhæfingu, fær engin lyf og í ofanálag hefur honum verið synjað um ferðaþjónustu fatlaðra – þjónustu sem hann hefur notað í átta ár – og kemst því ekki ferða sinna. „Þetta er bara eins og að setja mig í fangelsi,“ segir hann.

„Ég bíð bara eftir að veikjast aftur, annað hvort fæ ég heilablóðfall eða veikist af lifrarbólgunni.“

Nýju lyfin ekki afgreidd á Íslandi

Að sögn Ólafs er ekki vitað hvernig hann smitaðist af lifrarbólgu C, en hann og þáverandi kona hans greindust með sjúkdóminn á sama tíma, upp úr 1990. Nýlega kom í ljós að ekki væri ráðlagt fyrir hann að taka áfram gömlu lyfin við lifrarbólgunni vegna heilablóðfallanna. Sýnt hefur að gömlu lyfin