Halldór Ásgrímsson, fyrrverandi forsætisráðherra og formaður Framsóknarflokksins, er nú haldið sofandi á Landspítalann. Anna Sigrún Baldursdóttir, aðstoðarmanns forstjóra Landspítalans,  segir í samtali við Stundina að Halldór hafi verið færður á Landspítalan á laugardag.

Að hennar sögn var hann þungt haldinn við komu á spítalann. Samkvæmt frétt á dv.is fékk hann hjartaáfall síðastliðinn föstudag og var hann þá staddur í sumarbústað sínum við Álftavatn. Samkvæmt sömu frétt var hann fluttur með sjúkrabíl til Reykjavíkur. Að sögn Önnu fékk Halldór hjartaáfall aðfaranótt laugardags. 

„Það sem við getum sagt á þessum tímapunkti er að Halldór Ásgrímsson liggur þungt haldinn á gjörgæslunni við Hringbraut,“ segir Anna Sigrún. 

Halldór er 67 ára gamall og starfaði hann sem framkvæmdastjóri Norrænu ráðherranefndarinnar til ársins 2013.