Gilbert hryggbrotinn eftir árásina við Smáralind

Gilbert Sig­urðs­son er með brot á einum hryggjar­lið og annað brot á fæti eftir hrotta­lega árás fyrir utan Smára­lind í gær. Í sam­tali við Stundina segir Gilbert bein­brotin hafa komið í ljós við röntgen­mynda­töku á Lands­spít­al­anum. Hann hefur kært málið til lög­reglu. Gilbert segir árás­ar­menn hafa verið sjö tals­ins en ekki fimm líkt og kom fram í frétt DV í gær.

Menn­irnir réð­ust á Gilbert með ýmsum bar­eflum svo sem hafna­bolta­kylfu og stál­röri rétt fyrir fimm­leytið í gær. Að sögn Friðriks Smára Björg­vins­sonar yfir­lög­reglu­þjóns er einn grun­aðra árás­armanna í haldi lög­reglu. Hann segir að rann­sókna máls­ins sé á frum­stigi.

Að sögn Gilberts var for­sprakki árás­ar­innar Sævar Örn Hilm­ars­son, sonur Hilmars Leifs­sonar, en Gilbert hefur áður kært Sævar fyrir morð­hótun. Hilmar hefur átt í deilum við Gilbert um nokk­urt skeið og réðst Hilmar sjálfur á Gilbert fyrir utan Laugar síð­asta sumar. Hilmar var hátt­settur í glæpa­sam­tök­unum Hells Angels um skeið. Gilbert segir Hilmar standa að baki nýj­ustu árásinni.

„Nú kemur hann og ætlar að klára leik­inn.“

„Þessi sami maður hót­aði mér morð­hótun. Nú kemur hann og ætlar að klára leik­inn. Þetta endar með þessu. Ég hélt uppi vörnum en þetta end­aði með því að ég er hrygg­brot­inn,“ segir Gilbert.

Hilmar neitar aðkomu

Stundin náði tali af Hilmari Leifs­syni og vísar hann frá­sögn Gilberts á bug. Hann seg­ist ekki hafa haft neina aðkomu að mál­inu. „Þetta byrjar á því að Gilbert fer og skilur bíl­inn sinn eftir í gangi fyrir utan og fer inn til að berja tví­tugan dreng. Hann lemur þann strák. Í fram­haldi af því er hringt og vinir hans koma á stað­inn. Sævar var með í því en það voru tveir menn sem lentu í átökum við hann Gilbert. Hinir stóðu hjá og Sævar minn stóð hjá og gerði ekki neitt,“ segir Hilmar Leifsson. Líkt og fyrr segir stang­ast þessi lýs­ing á við lýs­ingu Gilberts. 

Hótanir frá Litla-Hrauni

Líkt og fyrr segir hefur Gilbert áður kært Sævar Örn fyrir hótun og fjall­aði Stundin um það í júlí­mán­uði. Hót­an­irnar bár­ust í gegnum Facebook í mars og apríl í fyrra. Þegar skila­boðin voru send var Sævar Örn í afplánun á Litla-Hrauni.

Stundin hefur undir höndum afrit af skila­boð­unum sem voru kærð til lög­reglu. Í fyrri skila­boð­unum segir: „Þú er nú meiri fokkkking ræf­ill­inn sökk­erpunsar 60 kall og hleypur í burtu eins og fokkking hræ í öðrum skónum þettaa er fokkking pabbi ég skal fokkking slatra þer fríkið þótt ég þurfi að eyða rest­inni af ævi­innni herna innni ég fokkkking slatra þér fokkkking krypppling­ur­inn þiinnn það er fokkking lof­orð.“

Þegar talað er um „sökk­erpuns“ vísar Sævar í atvik sem átti sér stað á Kaffi Mílanó í fyrra, þar sem slags­mál brut­ust út á milli Gilberts og Hilmars.

Í seinni skila­boð­unum er mað­ur­inn var­aður við aðgerðum gegn Hilmari: „Þú reðst a pabba minn af engri hel­vitis astæðu ef þið eruð að plana eh gegn pabba minum drep eg ykkur alla og þig fyrst ekki vera svona heimskur af engri astæðu nóg að okkur lenti saman en þetta er komið gott hvað a pabbi minn sem er 60 að nenna að þurfa standa í svona kjæftæði hann er með fjöl­skyldu en eg lofa þer því [...] eg er svo mik­ill pabba strakur að eg hugsa mig ekki tvisar um 16 ara dom fyrir hann svo þú vitir það bara látttu þetta kjurt ligggja.“

Skammbyssa, sterar og exi

Sævar er 22 ára, en þrátt fyrir ungan aldur er hann með marga dóma á bak­inu. Í maí í fyrra var hann dæmdur í 16 mán­aða fang­elsi fyrir lík­ams­árás, þjófnað og fjöl­mörg umferð­ar­laga­brot.

Í dómnum kemur fram að umtals­vert magn ólög­legs varn­ings var gerður upp­tækur á bæði heim­ili hans og í bif­reið hans. Þar má nefna úða­vopn og slöngu­byssu, hagla­byssu, loft­byssu, skamm­byssu, eft­ir­lík­ingu af skamm­byssu, raf­lost­byssu og skot­færi, sem ekki voru geymd í aðskildum læstum hirslum, hnúa­járn, exi, hníf með 18 cm löngu blaði, 3 hafna­bolta­kylfur, kylfu sem ekki var ætluð til íþrótta­iðk­unar, stungu­hníf, ana­ból­íska sterar, kanna­bis­lauf og 0,10 g af amfetamíni.