Netverjar keppast nú við að gagnrýna ríkisstjórnina undir myllumerkinu #EkkiSigríðurIngibjörgIngadóttir á samskiptavefnum Twitter. Dæmi um brandara sem nú fljúga á netinu eru: Hver telur þjóðina geðveika því hún skilur ekki hvað ríkisstjórnin er frábær? #EkkiSigríðurIngibjörgIngadóttir. Hver yfirgaf þingfund til að fá sér köku? #EkkiSigríðurIngibjörgIngadóttir. Í báðum tilvikum er verið að gagnrýna Sigmund Davíð Gunnlaugsson forsætisráðherra.
Hér má sjá fleiri dæmi:
Brandararnir komu í kjölfar popplagsins Hvar er kjarkurinn? sem vefmiðillinn Nútíminn birti í morgun og er unnið upp úr eldræðu Gunnars Braga Sveinssonar utanríkisráðherra á Alþingi í síðustu viku. Gunnari var heitt í hamsi eftir að minnihlutinn gagnrýndi ríkisstjórnina fyrir kjarkleysi þegar hún setti lög á verkefall heilbrigðisstarfsfólk. Gunnar Bragi spurði á móti hvar kjarkurinn hefði verið hjá síðustu ríkisstjórn í tengslum við kröfuhafana, Icesave og lán heimilanna.
Stundin náði tali af Sigríði Ingibjörgu sem hafði gaman af uppátækinu. „Mér þykir vænt um það að sjá að fólk noti nafnið mitt sem mótvægi við ríkisstjórnina. Ég get ekki verið annað en stolt af því,“ segir hún.
Athugasemdir