„Með hliðsjón af öllum þeim málavöxtum sem hér hafa verið raktir komst ég að þeirri niðurstöðu að mistök hefðu ekki átt sér stað við undirbúning og tilhögun atkvæðagreiðslunnar 1. júní og hún hefði verið í samræmi við lög, þingvenju og þingsköp,“ segir í yfirlýsingu forseta Íslands, Guðna Th. Jóhannessonar.
Fyrr í dag skrifaði Guðni undir skipunarbréf fimmtán dómara við Landsrétt. Í yfirlýsingu frá embætti forseta segir að vegna efasemda í opinberri umræðu um málsmeðferðina hafi Guðni ákveðið að kynna sér málið nánar. Niðurstaða þeirrar rannsóknar hafi verið sú að atkvæðagreiðslan væri í samræmi við lög.
Jón Þór Ólafsson, þingmaður Pírata, taldi að Alþingi hefði staðið ólöglega að skipun dómaranna. Hafði hann samband við Guðna og hvatti hann til þess að rannsaka málið. Þá var efnt til undirskriftasöfnunar á netinu þar sem skorað var á Guðna að skrifa ekki undir skipunarbréf dómaranna fimmtán og höfðu á fimmta þúsund manns skrifað undir í morgun.
Samkvæmt lögum um dómstóla bar Alþingi að greiða atkvæði með hverjum og einum umsækjanda. Þegar málið var afgreitt á Alþingi var hins vegar kosið um allan listann í heild. Í yfirlýsingu Guðna segir að enginn ágreiningur ríki um þá þingvenju, sem styðjist við ýmis ákvæði þingskapa, að kosið sé um lista í heild sinni, þegar fyrir liggi að þingmenn muni greiða eins atkvæði um öll atriði listans.
Undirskrift forseta Íslands var lokastaðfestingin á skipan dómara við Landsrétt en rétturinn mun taka til starfa næstu áramót. Dómarar við réttinn verða:
Aðalsteinn E. Jónasson, Arnfríður Einarsdóttir, Ásmundur Helgason, Davíð Þór Björgvinsson, Hervör Þorvaldsdóttir, Ingveldur Einarsdóttir, Jóhannes Sigurðsson, Jón Finnbjörnsson, Kristbjörg Stephensen, Oddný Mjöll Arnardóttir, Ragnheiður Bragadóttir, Ragnheiður Harðardóttir, Sigurður Tómas Magnússon, Vilhjálmur H. Vilhjálmsson, Þorgeir Ingi Njálsson.
Athugasemdir