„Því hefur verið lofað að nýja forsætisráðherranum síðast í gær á fundi að sala bankanna verði ekki að veruleika hjá þessari ríkisstjórn,“ skrifar Birgitta Jónsdóttir, kapteinn Pírata, á Facebook-síðu sína og deilir frétt RÚV þar sem haft er eftir Bjarna Benediktssyni fjármálaráðherra að pólitískur óstöðugleiki gæti seinkað sölu á hlut ríkisins í bönkunum. 

„Nú kemur loðna orðalagið frá Bjarna og alls ekki boðlegt að bankarnir séu seldir, ekki eitt % undir stjórn þessa fólks. Það er því miður svo að það er mjög erfitt að treysta neinu nema bindandi samkomulagi um þingrof. Og þó svo að þeir gera slíkt við minnihlutann þá er það því miður svo út af stjórnskipan landsins að ef ríkisstjórnin ákveður að ganga bak orða sinna að minnihlutinn hefur engin raunveruleg verkfæri til að stoppa eitt eða neitt. Þunginn hvílir á almannaáliti og fjölda fólks sem mætir á Austurvöll,“ skrifar Birgitta.

„Það er því miður svo að það er mjög erfitt að treysta neinu nema bindandi samkomulagi um þingrof.“

Í annarri færslu segir Birgitta ófremdarástand ríkja og að hún geti ekki treyst loforði forsætisráðherra um kosningar eftir þetta þing. „...þessi atburðarrás er hönnuð til að þjónka við Sjálfstæðisflokkinn og það verður allt reynt til að koma sér undan ábyrgð á því ástandi sem nú er í samfélaginu,“ skrifar hún meðal annars. „Bjarni segir á eina höndina að það eigi ekki að einakvæða LB en svo segir hann að það komi til greina að gera það ekki. Stór munur þar á. Sumir stjórnarliðar segja kosningar í haust og svo farið alla leið inn í enda október með dagsetningar. Það er ljóst að haustið er teygjanlegt hugtak all víða.“

Leggja til tímabundið bann við sölu á hlut ríkisins í bönkunum

Þingmenn Samfylkingarinnar lögðu í gær fram frumvarp um tímabundið bann við sölu á eignarhlutum ríkisins í fjármálafyrirtækjum, en lagt er til að bannið gildi til 1. nóvember næstkomandi. Í greinargerð með frumvarpinu segir að með þessu sé verið að bregðast við því fordæmalausa ástandi sem upp er komið í íslenskum stjórnmálum. „Ný ríkisstjórn er tekin til starfa og boðað hefur verið að almennar kosningar til Alþingis muni fara fram næsta haust. Ljóst er að staða þeirrar ríkisstjórnar sem nú situr er mjög ótrygg. Má þannig í raun líkja núverandi ríkisstjórn við starfsstjórn sem ætlað er að sitja fram yfir kosningar þegar ný ríkisstjórn mun taka við. Ekki er því eðlilegt að sú ríkisstjórn sem nú situr geti tekið afdrifaríkar og stefnumarkandi ákvarðanir á þeim fáu mánuðum sem eftir eru af starfstíma hennar. Slíkar ákvarðanir ber að bíða með að taka fram yfir næstu kosningar þar sem stjórnmálamenn munu fá nýtt umboð frá kjósendum til góðra verka,“ segir meðal annars í greinargerðinni. 

Árni Páll Árnason Samfylkingin leggur til tímabundið bann við sölu ríkisins á eignarhlutum í bönkunum.

Mynd: Kristinn Magnússon

Þá segir einnig að eignarhlutar ríkisins í fjármálafyrirtækjum séu gríðarlega verðmæti og því skipti miklu máli að fullkomið traust sé til stjórnvalda hafi þau í hyggju að selja að hluta eða að öllu leyti eignarhluti ríkisins. „Þar sem núverandi ríkisstjórn nýtur ekki trausts og ljóst að hún muni aðeins sitja í nokkra mánuði er ekki eðlilegt að fjármála- og efnahagsráðherra hafi þá heimild að selja eignarhluti ríkisins í fjármálafyrirtækjum. Í þessu sambandi verður einnig að hafa í huga að sala á eignarhlutum ríkisins í fjármálafyrirtækjum getur verið stefnumarkandi ákvörðun fyrir fjármálakerfið í heild sinni. Eignnarhald ríkisins á nánast öllu fjármálakerfinu gefur möguleika á því nú að endurskoða fjármálakerfið í heild sinni standi til þess pólitískur vilji,“ segir í greinargerð með frumvarpi Samfylkingarinnar.