Um verslunarmannahelgina í ágúst 2005 kom upp mál á Þjóðhátíð í Vestmannaeyjum. Árni Johnsen, fyrrverandi alþingismaður, var sakaður um að hafa kýlt Hreim Örn Heimisson söngvara á sviðinu í Herjólfsdal. Vitni sáu þegar atburðurinn varð og var staðfest að Árni hefði slegið söngvarann utan undir. Hreimur varð þriðji tónlistarmaðurinn til að verða fyrir hrammi þingmannsins þáverandi. Áður höfðu Páll Óskar Hjálmtýsson og Erpur Eyvindarson lent í ónáð Árna þannig að af hlaust líkamlegt ofbeldi.

DV sagði frá málinu í fyrsta tölublaði eftir hátíðina. Þar segir að Árni og Hreimur séu ekki sammála um atburðinn sem varð þegar fjöldi söngvara var kominn á svið til að syngja þjóðhátíðarlagið Lífið er yndislegt. Þá birtist Árni og veittist að Hreimi. Hreimur Örn sagði við DV að Árni hefði kýlt sig en Árni sagðist aftur á móti hafa rekist óviljandi í hann og strax beðist afsökunar. Vitni lýstu því að Árni hefði rekið Hreimi kröftugan löðrung.

„Síminn hefur ekki stoppað hjá mér í dag og fólk hefur verið að hvetja mig til að kæra. Ég ætla hins vegar ekki að gera það. Ég leyfi þjóðinni að hlæja að honum í staðinn,“ Hreimur við blaðið.

Árni Johnsen segir ekkert til í þessum ásökunum. „Þetta er úlfaldi í mýflugumynd,“ sagði hann í samtali við DV.

„Ég var að taka saman hljóðnema á sviðinu þegar ég rakst óviljandi utan í hann. Þetta er bara misskilningur. Ég bað hann afsökunar strax og man ekki betur en að við höfum gert út um þetta strax á sviðinu,“ sagði Árni. Hreimur vísar því til föðurhúsanna að Árni hafi beðið sig afsökunar á sviðinu. Hann sagði hegðun Árna hafa verið fáránlega.