Fjármálaráðherra segist ekki hafa aðgang að upplýsingum um útgjaldaliði – slíkt myndi „spilla fyrir hugmyndafræðinni“

Benedikt Jóhann­es­son, fjár­mála- og efna­hags­ráð­herra, seg­ist ekki hafa aðgang að þeim gögnum sem liggja til grund­vallar útgjaldar­ömmum ólíkra mál­efna­sviða í fjár­mála­á­ætlun rík­is­stjórn­ar­innar. Þetta kom fram í óund­ir­búnum fyr­ir­spurna­tíma á Alþingi í gær. Lýsti Benedikt þeirri skoðun sinni að ef kallað yrði eftir slíkum gögnum væri í raun verið að „skemma ferlið með fjár­mála­á­ætlun“. 

Jón Þór Ólafsson, þing­maður Pírata, kvaddi sér hljóðs í fyr­ir­spurna­tím­anum og benti á að í fjár­mála­á­ætlun rík­is­stjórn­ar­innar er ekki að finna upp­lýs­ingar um hvernig útgjöld innan ein­stakra mál­efna­sviða skipt­ast. 

„Hvorki þing­menn né fasta­nefndir hafa fengið aðgang að þessum upp­lýs­ingum um hvað sé mögu­legt að gera við allt þetta fjár­magn, hvað eigi að gera við það, hvað sé áætlað að gera við það. Án þess­ara upp­lýs­inga er ómögu­legt að taka upp­lýsta ákvörðun um hvort fjár­mála­á­ætlun sé far­sæl fyrir lands­menn og hvort vel sé farið með skattfé. Tölurnar liggja fyrir en við fáum ekki aðgang að þeim við þessa ákvarð­ana­töku,“ sagði hann og spurði: „Hefur hæst­virtur fjár­mála­ráð­herra aðgang að þessum upp­lýs­ingum sem liggja til grund­vallar þess­ari áætlun? Ef ekki, mun hann þá ekki óska eftir slíkum aðgangi? Ef ráð­herra hefur þann aðgang, eða þegar hann fær þann aðgang, mun hann jafn­framt veita okkur þing­mönnum aðgang?“ 

Mynd: Fjár­mála­ráðu­neytið

Benedikt svar­aði því til að ráðu­neytin legðu fram til­lögur um ramma útgjalda­sviða í fjár­mála­á­ætlun. Haft væri í huga hver fjár­fram­lögin hefðu verið í for­tíð­inni þegar gerðar væru til­lögur um ein­staka liði. Hann sagð­ist hins vegar sjálfur ekki hafa „aðgang að þessum gögnum, sund­ur­lið­uðum úr ein­stökum ráðu­neytið“ og bætti við:„Ég hef ekki þessi gögn og í sjálfu sér ef við förum að skipa fyrir um það þá erum við svo­lítið að skemma ferlið með fjár­mála­á­ætlun af því að þar erum við að tala um hinn breiða ramma. En við vitum auð­vitað hvernig fénu hefur verið varið til þessa. Það vita allir nokkurn veg­inn í hvað fjár­lög fara.“ Loks var­aði Benedikt við því að hug­mynda­fræð­inni á bak við fjár­mála­á­ætlun yrði kastað fyrir róða. „Ég tel að það sé í raun og veru verið að spilla fyrir hug­mynda­fræð­inni bak við þetta ef við förum að hugsa þetta sem ein­stakar fjár­veit­ingar á þessu stigi máls­ins, svo ég svari spurn­ingu hátt­virts þing­manns.“