„Þessi staður á fullt erindi í þáttinn. Þetta er ekki síst gert fyrir fólkið sem ekki á þess kost að ferðast um landið sitt en fær að sjá þessu fallegu staði íslenskrar náttúru í sjónvarpi,“ segir Lára Ómarsdóttir dagskrárgerðarmaður vegna þeirrar gagnrýni sem fram er komin vegna þess að hún sýndi frá upptökum Rauðfossakvíslar, einum af fegurstu stöðum íslenskrar náttúru í þætti sínum, Ferðastiklum, í gærkvöld.

Páll Ásgeir Ásgeirsson leiðsögumaður taldi rangt að vekja athygli á svæðinu sem þoli ekki mikinn ágang ferðafólks. Lýsti hann birtingu í Ferðastiklum sem „óhappaverki“. Mikil umræða hefur orðið vegna þess sjónarmiðs og sýnist sitt hverjum. Lára segist virða þær skoðanir sem fram hafi komið um að ekki eigi að vekja athygli á viðkvæmum stöðum í náttúrunni.

„Umræðan er af hinu góða en ég hvika ekki frá því að þetta átti erindi í þáttinn minn. Ég treysti fólki vel til þess að fara varlega þar sem um er að ræða viðkvæm svæði og ganga vel um Ísland,“ segir hún.

Myndskeið Láru frá Rauðfossakvísl vakti mikla athygli. Undurfagurt er þar yfir að líta. Í rauðum farvegi fossins blasa við slíkar kynjamyndir að menn hafda verið agndofa. Lára segir að umrædd leið frá Dómadalsleið að upptökum Rauðfossakvíslar sé opinber og vandalaust fyrir flesta að finna staðinn.

„Meðfram henni er skipulögð gönguleið á vegum sveitarfélagssins Rangaárþings ytra. Ég fékk upplýsingar um þennan stað frá fólki sem farið hafði í skipulagðar ferðir þangað,“ segir Lára sem hyggst ótrauð halda áfram að sýna þjóðinni gimsteina íslenskrar náttúru.