Fyrir rúmlega tveimur árum var Ann-Sofie Rokbøl á leiðinni með flugi til Kanada. Á löngu fluginu fór hún að spjalla við manninn í sætinu við hliðina á henni, sem reyndist vera frá Íslandi. Það átti eftir að verða afdrifaríkt samtal. „Á milli þess sem við töluðum saman sváfum við á öxl hvort annars. Ég var á leiðinni til Kanada til að læra og eftir fyrstu önnina hittumst við í New York og fórum svo til Reykjavíkur saman. Þar hófst ástarsamband mitt við Ísland. Ég varð ástfangin af borginni, lista- og tónlistarsenunni, tungumálinu og náttúrunni. Ég hef oft komið til Íslands síðan og það hefur verið mér mikill innblástur. Fyrst þegar ég kom hugsaði ég með mér að það yrði stórkostlegt að fara á tónleikaferðalag til Íslands einhvern tímann. Nú er loksins að verða af því,“ segir Ann-Sofie, sem ber listamannsnafnið Eif. Á laugardagskvöldi í janúar ætlar hún að halda tónleika í Norræna húsinu.