Facebook-deiling Riddarans Ölstofu í Kópavogi hefur vakið hörð viðbrögð en kráin deildi í fyrradag mynd af fáklæddri konu í jólasveinabúning, bundinni með reipi og með límband yfir munninum.

„Hey ... Við erum búin að opna á þessum fallega og frískandi mánudegi ... Gleðistundin er byrjuð ... og jólin að klárast,“ skrifar kráin við færsluna.

Hörð gagnrýni birtist á myndbirtinguna í athugasemdum við færsluna. Alba Rós spyr í athugasemd hver sé tilgangurinn með því að birta slíka mynd í auglýsingarskyni. „Nú það er einfaldlega svo..að jólin eru að klárast, þá bindum við þetta allt saman. Hvort sem um flókið jólaskraut er að ræða eða bara þetta einfalda,“ svarar kráin.

Ásta Marteins spyr á móti hvort manneskjan sé jólaskrautið í þessari lýsingu. „Ja, hún kom við og skemmti gestum þessi elska. En aðventan var sérstaklega skemmtileg hjá okkur á Riddara við fengum svo marga skemmtilega viðskiptavini og skemmtikrafta. En jólin voru tekin niður í dag og nú er hversdagsleikinn tekinn við með fótboltaveislu og fullt af ísköldum bjór. Tölum nú ekki um allt fallega fólkið sem dettur inn,“ svarar Riddarinn.

Í kjölfarið á þessu svari gera margir athugasemd við færsluna. „Pointið var ábyggilega til að reyna að fá sem fæstar konur til sín, þeim á riddaranum finnst kynbundið ofbeldi nefnilega rosalega fyndið,“ skrifar til að mynda Una Geirdís Flosadóttir. Því hafnar Riddarinn og segir kynbundið ofbeldi ekki eiga sér stað á Riddaranum heldur „bara fótbolti og fallegt fólk. Þessi jólasveinastelpa var bara að sýna okkur töfrabragð jólana“.

Fjölmargir lýsa vanþóknun sinni á færslu Riddarans. „Að binda konu og líma fyrir munninn á henni er ekki bara taktlaust, siðlaust og niðurlægjandi heldur kallast það ofbeldi. Þið ættuð að skammast ykkar!“ skrifar til að mynda Eyrún Viktorsdóttir. Ísak Jónsson lýsir því yfir að hann muni ekki stunda viðskipti við krána aftur. „Þetta er ógeðslegt ég hef aldrei verið jafn pirruð út í auglýsingu,“ skrifar Gréta Þórunn Rúnarsdóttir.