Í grein sem birtist á vefsíðunni vald.org, sem haldið er úti af Jóhannesi Birni Lúðvíkssyni höfundi bókarinnar Falið vald, er bent á að Bjarni Benediktsson, fjármálaráðherra og formaður Sjálfstæðisflokksins, sé enn skráður umboðsmaður Elkem á Íslandi samkvæmt fyrirtækjaskrá. Stundin hefur fengið það staðfest af aðstoðarmönnum Bjarna að þetta sé rétt. Ástæðan sé hins vegar frekar sakleysisleg, skráningu hafi einfaldlega ekki verið breytt frá árinu 2003 þegar Bjarni tók að sér sem lögfræðingur að stofna bankareikning fyrir félagið.

Uppfærist ekki sjálfkrafa

„Þetta var nú ekki neitt, neitt. Bjarni var lögmaður á Lex til ársins 2003, eða fram að kosningum 2003 þegar hann tók sæti á Alþingi. Eitt tengt því hefur greinilega verið það að hann hefur verið skráður sem umboðsaðili þegar félagið var að stofna bankareikning, útibú. Þetta er svona útibúsmál. Hann hafði eins og lögmenn gera gjarnan, átt að vera tengiliðurinn á þeim tíma þegar það mál var í gangi,“ segir Teitur Björn Einarsson, aðstoðarmaður Bjarna, í samtali við Stundina. Teitur segir að þrátt fyrir þessa skráningu hafi Bjarni ekki starfað sem umboðsmaður Elkem á Íslandi samhlið þingmennsku. „Þetta er skráning sem uppfærist ekkert sjálfkrafa ef það gerist ekki neitt. Það var enginn að pæla í þessu, þetta hefur enga þýðingu þar sem hann er ekki lengur lögmaður,“ segir Teitur.

Elkem á að lagfæra skráninguna

Hann segir að þegar þetta var kannað kom í ljós að félagið hafi rekið sig á þetta atriði líka. „Félagið þarf að sjá um þetta. Bjarni hefur ekkert með þetta að gera og hann hlutast ekkert til um skráningu. Ef það þarf að koma nýju upplýsingum á framfæri þá er það félagsins að lagfæra þær,“ segir Teitur.

Segja Bjarna ganga erinda Elkem

Alcoa eignaðist álreksturseiningu Elkem árið 2008 en eiginmaður Ólafar Nordal, innanríkisráðherra, er framkvæmdastjóri frumframleiðslu Alcoa á heimsvísu. Öllum að óvörum skipaði Bjarni Ólöfu sem innanríkisráðherra í desember á síðasta ári. Í janúar 2011 eignaðist síðan kínverska samsteypan China National Bluestar, Elkem. Í grein vald.org segir að fríverslunarsamningurinn, sem gerður var við Kína á síðasta ári, hafi því í för með sér gífurlega hagræðingu á rekstri fyrirtækisins á milli Íslands og Kína á kostnað ríkisins. Í greininni er þannig ýjað að því að Bjarni gangi erinda fyrirtækisins Elkems en ekki almennings í ákvörðunum sínum.

Teitur gefur ekki mikið fyrir greinina á vald.org. „Ég skautaði aðeins yfir þetta. Það er nú þannig að það er talað um Elkem Silikor Material. Þetta er nú tvö félög að mér skilst, í samkeppni. Þannig að eftir það, þá var verið að rugla öllu saman. Þannig að við erum ekkert að spá í því,“ segir Teitur.