Maður er látinn eftir flugslys. Hann var annar tveggja sem var um borð í lítilli flugvél sem hefur verið leitað í dag. Flugvélin lagði af stað frá Akureyri um klukkan 14 áleiðis til Keflavíkur. Áætluð lending var klukkan 16:20 en þegar vélin var enn ókomin klukkan 17 var samhæfingarstöð ríkislögreglustjóra ræst.

Í kjölfarið hófst umfangsmikil leit lögreglu, björgunarsveita og Landhelgisgæslunnar. Allar björgunarsveitir Slysvarnarfélagsins Landsbjargar af Norðurlandi, Vesturlandi og Suðurlandi voru kallaðar út en alls eru það 43 björgunarsveitir. Yfir 200 manns tóku þátt í leitinni, gangandi, á fjórhólum, fjallavélhjólum, jeppum og annars konar bifreiðum. Báðar þyrlur Landhelgisgæslunnar voru kallaðar út.

Flugvélin var eins hreyfils vél og flaug í sjónflugi svo hún kom ekki fram á radartækjum flugumferðarstjórnar. Fyrir norðan viðraði ekki vel fyrir sjónflug í dag þar sem lágskýjað var og þungbúið.

Barkárdalur Flugvélin fannst um kl. 20.30 í kvöld eftir umfangsmikla leit björgunarsveita, lögreglu og Landhelgisgæslunnar.

Leitarsvæðið náði frá Akureyri og víkkaði út suður yfir hálendið. Talað var við bændur og ferðalanga um hvort þeir hefðu orðið varir við flugvél á þessari leið. 

Það var svo þyrla Landhelgisgæslunnar sem fann vélina innarlega í Barkárdal við Gíslahnjúk um kl. 20.30.

Annar aðilinn var þá látinn en hinn var fluttur slasaður með þyrlu Landhelgisgæslunnar til Akureyrar og þaðan með sjúkraflugi til Reykjavíkur. Frekari upplýsingar eru ekki gefnar um ástand hans.

Samkvæmt tilkynningu frá lögreglu er ekki unnt að greina frá nöfnum þeirra sem voru um borð í flugvélinni. Þar sem rannsókn málsins stendur yfir er ekki heldur hægt að gefa frekari upplýsingar um málið að svo stöddu.