Arnþrúður Karlsdóttir, útvarpsstjóri Útvarps Sögu, sendi Björk Eiðsdóttur, ritstjóra MAN Magasíns, hraðskeyti í dag þar sem þess er krafist að nýjasta tölublað MAN verði innkallað vegna ólöglegrar birtingar á efni í eigu Útvarps Sögu. Um er að ræða bæði myndir og texta og segir í bréfinu að um skýlaust brot á lögum sé að ræða. Í bréfinu segir hins vegar ekki hvaða lög hafi verið brotin með birtingunni. „Ég var með grein í blaðinu sem kom út núna í janúar um innhringitímann á Útvarpi Sögu,“ segir Björk í samtali við Stundina. Yfirskrift greinarinnar er „(G)óðir hlustendur“ en þar er meðal annars vitnað til nokkurra ummæla frá algengustu innhringjendum útvarpsstöðvarinnar. Blaðamaðurinn Þórarinn Þórarinsson skrifar greinina en henni fylgja einnig myndir sem Björk segist hafa fengið af opinberri Facebook-síðu Útvarps Sögu. „Þetta efni býr sig til sjálft. Um er að ræða beinar tilvitnanir í þennan innhringitíma og þrjár myndir af Facebook. Þetta er allt opinbert efni. Innhringitíma þeirra er bæði útvarpað og hægt er að hlusta á hann á netinu líka,“ segir Björk. 

Björk hyggst ekki verða við kröfum Arnþrúðar og innkalla blaðið. Aðspurð hvort hún muni bregðast við bréfinu með einhverjum öðrum hætti segir hún: „Í bréfinu er ekki kallað á eftir neinum öðrum viðbrögðum. Við erum ekki beðin um svör og þá er ekki vísað í neina lagabókstafi. Þannig ég held ég muni ekki bregðast við þessu með neinum hætti.“

Ekki náðist í Arnþrúði Karlsdóttur við vinnslu þessarar fréttar. 

Umrædd grein Greinin (G)óðir hlustendur - þið eruð að hlusta á Útvarp Sögu, eftir Þórarinn Þórarinsson, birtist í janúarblaði MAN sem var dreift til áskrifenda í síðustu viku.