Eldsneytissalinn Skeljungur og Gallon, sem rekur birgðastöðvar fyrir eldsneyti á Íslandi, hafa undirritað viljayfirlýsingu við danska sjóðinn CI Energy Transition Fund I um að skoða möguleika fyrirtækjanna tveggja á að kaupa rafeldsneyti af sjóðnum og dreifa því og selja, meðal annars til íslenskra notenda. Bæði Skeljungur og Gallon eru að öllu leyti í eigu fjárfestingarfélagsins SKEL, sem skráð er á íslenskan hlutabréfamarkað.
CI Energy Transition Fund I er nýr sjóður í eigu Copenhagen Infrastructure Partners (CIP) og er stærsti sjóður heims sem er tileinkaður fjárfestingum í verkefnum tengdu grænu rafeldsneyti. CIP stefnir á framleiðslu rafeldsneytis í Orkugarði Austurlands á Reyðarfirði, en orkugarðurinn er samstarfsvettvangur um nýtingu grænna tækifæra á Austurlandi. Markmið hans er að stuðla að aukinni verðmætasköpun og byggja upp þekkingu á orkuskiptum á svæðinu.
Um er að ræða fyrsta viljayfirlýsingu þessarar gerðar sem gerð hefur verið á Íslandi.
Í tilkynningu frá Skeljungi vegna þessa segir að markmið stjórnvalda um orkuskipti í sjávarútvegi og skipaflutningum náist aðeins ef skipafélög og útgerðir geti skipt út jarðefnaeldsneyti fyrir aðra og umhverfisvænni orkugjafa. „CIP, Skeljungur og Gallon hafa trú á því að rafeldsneyti sé leiðin til að hætta losun koltvísýrings í siglingum. Til að það takist þarf innviði, sem sumir hverjir eru til staðar, en aðra þarf að byggja frá grunni.“
Þórður Guðjónsson, framkvæmdastjóri Skeljungs, segir á sama stað að fyrirtækið sé stolt að gerast samstarfsaðilar CIP í þeirri vegferð sem sjóðurinn sé í.

SKEL fjárfestingafélag hét áður Skeljungur í 93 ár. Nafni og tilgangi félagsins var breytt í byrjun þess. Strengur, eignarhaldsfélag sem stjórnarformaðurinn Jón Ásgeir Jóhannesson fer fyrir, á 50,1 prósent hlut í félaginu og hefur því tögl og hagldir innan þess. SKEL átti 23,5 milljarða króna í eigið fé í lok september síðastliðins.
Í fjárfestakynningu SKEL vegna uppgjörs þriðja ársfjórðungs var sérstaklega fjallað um orkuskipti og innviði. Þar var gengið út frá því að það þyrfti að framleiða 16 TWst af raforku á ári til viðbótar við þær 20 TWst sem nú eru framleiddar hérlendis til að ná fullum orkuskiptum og sagt að heildar umfang fjárfestinga, fjárfestingarþarfar í viðhaldi og eflingu innviða vegna þessa væri yfir 1.000 milljarða króna. „Ljóst að hvert svo sem hlutfallið af þessari fjárfestingu verður, þá er þörfin fyrir þjónustuaðila, orku og tæki umtalsverð og líkleg til að aukast Orkuskipti í stærri tækjum, svo sem vinnuvélum og vöruflutningabifreiðum, verða líklega hraðari en rafbílavæðingin.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.


















































Athugasemdir