Ritstjórn Morgunblaðsins svarar ekki fyrirspurn um hverjir hafi skrifað fréttir á Mbl.is á meðan verkfall Blaðamannafélags Íslands stóð yfir frá klukkan 10 til 14 í dag. Á annan tug frétta birtist á vefnum á þessu tímabili.

„Það eru auðvitað bara blaðamenn sem vinna á vefmiðlum sem eiga að skrifa þessar fréttir og þeir lögðu niður störf þannig að þetta er hreint og klárt verkfallsbrot,“ segir Hjálmar Jónsson, formaður Blaðamannafélags Íslands.

Fréttamenn, ljósmyndarar og myndatökumenn á vefmiðlunum Fréttablaðinu, Morgunblaðinu, RÚV og Vísi lögðu niður störf í fjóra tíma í dag vegna yfirstandandi kjaradeilu. Stór hluti blaðamanna RÚV eru í öðru félagi, Félagi fréttamanna, svo verkfallið hafði minni áhrif þar.

Svör fengust ekki frá ritstjórn Morgunblaðsins við fyrirspurn Stundarinnar um hverjir hafi skrifað frétt á vef Mbl.is. Vísað var á ritstjóra blaðsins en þeir voru á fundi samkvæmt skiptiborði. „Ég þykist vita hverjir þetta eru en ég ætla ekki að nafngreina þá,“ segir Hjálmar. „Ég er ekki að persónugera þetta, en það er óskiljanlegt að þetta skuli hafi gerst og menn gangi fram með þessum hætti og virði ekki eðlilegan rétt stéttarfélaga til að boða vinnustöðvun.“

„Ég þykist vita hverjir þetta eru en ég ætla ekki að nafngreina þá“

Hjálmar segist telja að ritstjórar eða aðrir starfsmenn utan félagsins megi ekki ganga inn í þessi störf á meðan verkfallið stendur yfir. „Þetta er frumréttur vinnandi fólks og það var tekist á um þetta í upphafi 20. aldarinnar,“ segir hann. „Ef hver sem er gæti gengið inn í þau störf sem eru lögð niður yrði verkfallsrétturinn einskis virði. Hann hefur hingað til verið virtur á Íslandi. Hér er um að ræða sanngjarnar og lágar kröfur.“

Hjálmar segir að hvað RÚV varðar hafi verið gengið í störf fastra starfsmanna og því um verkfallsbrot þar einnig að ræða. „Það eru tvö stéttarfélög með tækni- og myndatökumenn innan sinna vébanda, Rafiðnaðarsambandið og Blaðamannafélagið. Við gerum ekki athugasemdir við að fastráðnir félagar í Rafiðnaðarsambandinu vinni sína vinnu, við höfum ekki valdboð yfir þeim. Við erum að fara yfir þetta með okkar lögfræðingi og munum væntanlega fara með þessi brot fyrir Félagsdóm,“ segir Hjálmar.

Verkfallið er það fyrsta sem fer fram á netmiðlum. Efni kemur inn á vefina með ýmsum hætti og því í mörg horn að líta, að mati Hjálmars. „Ég hef því í þrígang skrifað fréttastjórum, yfirmönnum og framkvæmdastjórum fyrirtækjanna og óskað eftir því að við færum yfir framkvæmdina á verkfallinu og tækluðum möguleg ágreiningsefni áður en þau kæmu upp,“ segir Hjálmar. „Ég hef ekkert svar fengið nema frá Sýn, þar sem allt fór fram til fyrirmyndar. Og ég veit ekki annað en á Fréttablaðinu hafi það verið með sama hætti.“

Stundin, Kjarninn og Birtingur hafa þegar náð samningum við Blaðamannafélagið.