„Komdu út að leika með okkur! Sala hefst í nóv­em­ber. Við gefum 1000 miða!“ segir á heima­síðu nýs íslensks lággjalda­flug­fé­lags, sem kynnt var í morgun undir heit­inu PLAY.

Félagið hafði áður vinnu­heitið WAB-air (We Are Back) og var stofnað af fyrr­ver­andi starfs­mönnum WOW air. Skúli Mogensen, fyrr­ver­andi eig­andi og for­stjóri WOW air, óskaði stofn­endum PLAY til ham­ingju í morgun. „Vil óska vinum mínum hjá Play inni­lega til ham­ingju með þennan áfanga! Ég dáist að þraut­segju þeirra að hafa kom­ist svona langt og veit hversu mögnuð þau eru! Hlakka til að fara út í heim að leika!!“

Meðal aðstand­enda félags­ins eru Arnar Már Magn­ús­son, fyrr­ver­andi flug­stjóri og yfir­maður hjá WOW air, Sveinn Ingi Stein­þórs­son, fyrr­ver­andi yfir­maður á sviði við­skipta­greindar og fjár­hags­grein­inga WOW air og áður starfs­maður Air Atlanta, Jónína Guð­munds­dóttir, fyrr­ver­andi fram­kvæmda­stjóri mannauðs­sviðs WOW air, og Daníel Snæ­björns­son, áður verk­efna­stjóri hjá WOW air, með meistara­gráðu í flug­um­ferð­ar­stjórnun.

Flogið fyrst til Evrópu

Í til­kynn­ingu frá félag­inu eftir blaða­manna­fund í Perlunni í morgun kom fram að flogið verði til Evrópu í vetur en að til standi að bæta við flugi til Norður-Ameríku „á kom­andi vor­mán­uðum“. 

For­stjóri PLAY er Arnar Már Magn­ús­son. Flug­fé­lagið leitar nú að starfs­fólki, sam­kvæmt til­kynn­ingu félags­ins. „Að baki PLAY stendur hópur fólks með víð­tæka reynslu úr flug­heim­inum en margir starfs­menn PLAY hafa áður starfað hjá flug­fé­lögum á borð við WOW air og Air Atlanta. Þá stendur til að ráða fjölda starfs­manna á næstu vikum bæði á skrif­stofu félags­ins og áhafn­ar­með­limi.“

Þá kemur fram hjá PLAY að leigðar verði Airbus A320 vélar sem taka 200 manns í sæti. Vélarnar verði orðnar sex tals­ins næsta sumar, en þeim muni fjölga í tíu á þremur árum ef áætl­anir ganga eftir.

Mark­aðs­stefna PLAY ber nokkurn keim af WOW air, þar sem félagið gerir út á leik­gleði og gam­an­semi. Ein­kenn­is­orð PLAY er „leik­völlur í háloft­unum“. „Hjá PLAY er öryggið alltaf í fyrsta sæti og við leggjum mikla áherslu á stund­vísi, ein­fald­leika, gleði og hag­stætt verð,“ segir félagið.

Leita að fjölda starfsfólks

Í aug­lýs­ingu frá félag­inu á vef­síðu þess, flyplay.com, er til­tekið að félagið leiti að „bros­andi flug­liðum“, bæði í sumar- og fram­tíð­ar­störf, leitað sé að for­söðu­manni fjár­mála­deildar, „metn­að­ar­fullum og öfl­ugum stjórn­anda með fram­úr­skar­andi sam­skipta­hæfni og drif­kraft til að leiða sölu- og mark­aðs­mál PLAY“, „mark­aðs­gúru“, „sölu­séní“, „tal­naglöggv­ara“, gjald­kera og „leik­fé­laga“, en það síð­ast­nefna er „jákvæður sölu­full­trúi til að ræða við við­skipta­vini á sam­fé­lags­miðlum, í pósti og net­spjalli“, bæði í dag­vinnu og hluta­starfi á kvöldin og um helgar. „Við viljum bæta í hóp­inn jákvæðu og kraft­miklu fólki sem vill taka þátt í að breyta íslenskri flug­sögu,“ segir í lýs­ingu félags­ins.