„Forsagan að því að við fluttum hingað er sú að árið 2018 var mér boðið að koma hingað á Bjór­garð­inn sem kokkur á Food and Fun og og eld­aði þá bæði paellu og tapas og end­ur­tókum við svo leik­inn nú í ár. Í fram­hald­inu vorum ég og Ernesto, sam­býl­is­maður minn, stað­ráðnir í að flytja hingað til Íslands og halda áfram að elda okkar sér­rétti fyrir Íslend­inga. Við höfum nú verið búsettir hér síðan í maí og hófum að bjóða gestum upp á tapas hér í Bjór­garð­inum í júlí. Okkur langar að inn­leiða sið­ina og stemn­ing­una í kringum tapas inn í hvers­dags­líf Íslend­inga. Íslend­ingar eru jú mjög hrifnir af Spáni og eru að mínu mati alls ekki ósvip­aðir íbúum á Norður-Spáni svo þetta fyr­ir­komu­lag hentar þeim vel,“ segir Esteban. 

Líka fasteignasali og jógakennari

Estaban hafði starfað í ára­tug sem kokkur í Barcelona þegar hann ákvað að söðla um og hefja störf sem fast­eigna­sali. Því starfi sinnti hann í 14 ár en þá tog­aði elda­mennskan hann aftur til sín og hóf hann þá að starfa sem kokkur ein­göngu fyrir einka­sam­kvæmi og við­burði. Hann hefur hug á að taka einnig að sér slíkt hér­lendis en fyrir fimm árum gerð­ist hann einnig jóga­kenn­ari og starfar sem slíkur hér­lendis í og með elda­mennsk­unni. Hann leggur sig fram við að elda ein­göngu úr ferskum og hollum hrá­efnum enda ekki annað hægt fyrir kokk sem einnig stundar og kennir jóga.

Tapas til varnar flugum

„Upp­haf­lega þýðir orðið tapas lok og voru litlar brauð­sneiðar eða litlir diskar bornir fram með drykkjum þannig að fólk gæti sett þá ofan á glasið sitt og varnað flugum að kom­ast ofan í glasið! Á suður Spáni er meiri hefð fyrir tapas sem merkir í dag smáir skammtar af kjöti bornu fram á litlum diski en pinchos á norður Spáni sem er brauð með áleggi ofan á. Tortilla de pata­tas, spænska útgáfan af kart­öflu og lauk-eggja­köku, er mjög hefð­bundin svo og þurrkuð skinka eða pincho de jamón en á Norður-Spáni er mjög hefð­bund­inn réttur pincho pimi­ento de piquillo sem gerður er úr rauðum paprikum fylltum með blöndu af tún­fiski í olíu, osti og tómat. Tapas með önd eða laxi er síðan meira í íslenskum anda og slíkt er líka á mat­seðl­inum. Allt saman úr fers­kasta hrá­efn­inu hverju sinni og búið til sam­dæg­urs,“ segir Esteban.

Ein­fald­asti tapas rétt­ur­inn til að prófa heima fyrir segir Esteban að sé tortilla de pata­tas. Í eggja­hræruna þarf aðeins kart­öflur sem eru soðnar og afhýddar, þær eru síðan skornar niður og steiktar í olíu og svolitlu salti, takið frá alla auka olíu og bætið við eggi. Hrærið í og eldið í nokkrar mín­útur, berið síðan fram ykkar eigin tortilla de pata­tas! Bon app­etit!!!