„Hvernig skrifar þú líkræðu um jökul? Hugsaðu um það. Hvernig mundir þú nálgast það, hafandi alist upp við jökla sem jarðfræðilegan fasta, sem tákn um eilífðina? Hvernig segirðu bless?“

Svona hefst grein rithöfundarins Andra Snæs Magnasonar um jökulinn Ok í The Guardian í íslenskri þýðingu blaðamanns. Ok telst ekki lengur jökull að mati jöklafræðinga. Hlýnun jarðar hefur valdið því að jöklar víðs vegar um heim hafa bráðnað og hopað. Andri Snær ritaði áletrunina „Bréf til framtíðarinnar“ á minnisvarða um Okjökul sem verður komið fyrir á sunnudag.

„Fari sem horfir munu allir jöklar á Íslandi hverfa á næstu 200 árum. Þannig að minnisvarðinn um Ok mun vera sá fyrsti af 400 á Íslandi einu og sér,“ skrifar Andri Snær í greininni. „Snæfellsjökull, þar sem Jules Verne hóf ferð sína að miðju jarðar í Leyndardómum Snæfellsjökuls, verður að líkindum horfinn á næstu 30 árum og það verður mikill missir. Jökullinn er fyrir Ísland það sem Fuji fjall er fyrir Japan.“

Andri Snær segir fjölskyldu sína hafa átt persónuleg tengsl við jöklana þar sem amma hans og afi hafi komið að stofnun Jöklarannsóknafélags Íslands. Fóru þau í jöklaferð þegar þau voru nýgift og heitir hluti Vatnajökuls þar sem þau tjölduðu nú Brúðarbunga.

OkjökullMyndir sem teknar voru með gervihnetti NASA sýna breytinguna frá 1986 til 2019.

Mynd: NASA Earth Observatory

„Bráðnun allra jökla Íslands mun hækka sjávarmál á heimsvísu um einn sentimetra,“ skrifar hann. „Það virðist kannski ekki mikið, en þegar ferlið er endurtekið um víða veröld munu flóðin hafa áhrif á hundruð milljóna fólks. Mesta áhyggjuefnið er bráðnun jökla Himalaya fjalla. Þau eru okið sem ber vatn til eins milljarðs mannfólks.“

Andri Snær bendir á að þrátt fyrir að eldgosið í Eyjafjallajökli árið 2010 hafi losað 150 þúsund tonn af koltvísýring daglega, hafi það verið smámunir miðað við að mannkynið losar 100 milljón tonn á dag. „Dagleg áhrif mannfólks jafnast á við yfir 600 slík eldfjöll. Ímyndaðu þér öll þessi eldgos á hverri heimsálfu, allan dag, alla nótt, allt árið um kring og segðu sjálfum þér að það hafi ekki áhrif á loftslagið,“ skrifar hann.

„Svo við letruðum þetta á koparskiltið sem heldur uppi minningu Okjökuls til ástvina okkar í framtíðinni: „Við vitum hvað er að gerast og hvað þarf að gera. Aðeisn þú veist hvort við gerðum eitthvað.““