Að minnsta kosti sjö af umsækjendum um stöðu seðlabankastjóra hafa andmælt mati hæfnisnefndar á umsækjendunum. Telja þeir að nefndin hafi ekki gætt jafnræðis umsækjenda og hafi hunsað þær breytingar sem verða á starfinu við sameiningu Seðlabankans og Fjármálaeftirlitsins. Þetta kemur fram í Fréttablaðinu í dag.

Umsækjendurnir telja verulega vankanta á málsmeðferð nefndarinnar og segja að stjórnunarhæfileikar hafi lítið sem ekkert verið ræddir í viðtölum við þorra umsækjenda. Aðeins fimm umsækjendur voru boðaðir í framhaldsviðtal þar sem stjórnunarhæfileikar voru ræddir og telja umsækjendur að jafnræðisregla hafi verið brotin með því að fá ekki tækifæri til að ræða það atriði. Nefndin hafi því ekki gert heildstæðan samanburð á umsækjendum.

Katrín Jakobsdóttir forsætisráðherra mun velja nýjan seðlabankastjóra úr hópi umsækjenda í júlí. Fjórir voru metnir mjög vel hæfir, þeir Arnór Sighvatsson, Ásgeir Jónsson, Gylfi Magnússon og Jón Daníelsson. Þá voru Gunnar Haraldsson, Gylfi Arnbjörnsson, Katrín Ólafsdóttir, Sturla Pálsson og Sigurður Hannesson metin vel hæf. Loks voru Ásgeir Brynjar Torfason, Jón Gunnar Jónsson og Vilhjálmur Bjarnason metnir hæfir.