Það jafnast fátt á við góða göngu í fallegri náttúru til að efla andann og bæta hreysti. Samt sem áður gerum við mörg hver ekki nógu mikið af því að ganga. Við afsökum okkur með því hversu upptekin við erum, höfum ekki tíma, erum í of lélegu formi, eigum ekki pening, réttan útbúnað eða bíl til þess að koma okkur á áfangastað. En raunin er sú að við þurfum ekki mikið annað en okkur sjálf til þess að fara í góða heilsubætandi göngu. Við þurfum yfirleitt ekki að leita langt yfir skammt til að finna góð útivistarsvæði, bæði innan sem og utan bæjarmarka. Jafnframt eru til fjölmargir gönguhópar þar sem boðið er upp á rútuferðir á upphafsreit eða að samferðafólk safnist saman í bíla. En það reynist oft erfitt að koma sér af stað og stundum er það einfaldlega of þægilegt að henda sér í sófann þegar heim er komið …