Alls slösuðust eða létust 1289 manns í umferðinni árið 2018, samkvæmt nýrri skýrslu Samgöngustofu. 18 manns dóu í fimmtán banaslysum og áttu karlmenn sök að máli í fjórtán þeirra. Ellefu þeirra látnu voru 36 ára eða yngri.
Í skýrslunni kemur fram að alvarlegum slysum vegna ölvunar- og fíkniefnaksturs fjölgar og sömuleiðis vegna framanákeyrslu. Á hinn bóginn fækkar alvarlegum slysum sem ungir ökumenn, á aldrinum 17 til 20 ára, eiga aðild að. Flest slys og óhöpp verða á gatnamótum Miklubrautar og Kringlumýrarbrautar. Þar á eftir eru annars vegar tvö önnur stór gatnamót við Miklubraut og hins vegar þrjú gatnamót eða hringtorg í Hafnarfirði. Vegagerðin nýtir skýrsluna til að forgangsraða framkvæmdum.
Sigurður Ingi Jóhannsson, samgöngu- og sveitarstjórnarráðherra, sagði í ávarpi á fundi um skýrsluna í morgun að mikilvægt væri að bæta umferðaröryggi. „Á aðeins fimm árum hefur umferðin á þjóðvegunum aukist um ríflega 40%,“ sagði Sigurður Ingi. „Umferðarslys og óhöpp eru talin kosta yfir 50 milljarða á ári, og er þá ekki talinn sá sársauki og sorg sem slysunum fylgja. Því er til mikils að vinna að draga úr slysum með öllum tiltækum ráðum. Því legg ég áherslu á að mannslíf og heilsa verði ávallt höfð í öndvegi og öryggi metið framar en ferðatími í forgangsröðun.“
Þá sagði ráðherra að ríkisstjórnin ætli að verja 120 milljörðum króna til vegaframkvæmda næstu fimm árin. Meðal annars verði aðskildar akstursstefnur á umferðarþyngstu þjóðvegum. „Nefna má að umferðarslysum á Reykjanesbrautinni hefur fækkað um 40% frá því að aksturstefnur voru aðskildar,“ sagði Sigurður Ingi.
Athugasemdir