Allir eiga rétt á virkri þátttöku í samfélaginu og sanngjarnri og réttlátri meðferð óháð uppruna, segir í mannréttindastefnu borgarinnar, sem samþykkt var á síðasta kjörtímabili. Það á við um samfélag, veitingu þjónustu og ekki síður að Reykjavíkurborg sem vinnustaður hugi sérstaklega að þeim starfsmönnum sem eru af erlendum uppruna og veiti þeim nauðsynlegan stuðning svo þau geti sinnt sínu starfi sem allra best. Í fyrra voru jafnframt samþykkt lög frá Alþingi um jafna meðferð á vinnumarkaði og jafna meðferð einstaklinga óháð kynþætti og þjóðernisuppruna. Lög þessi voru mikið réttlætis- og framfaraskref og ríma þau afar vel við þá miklu áherslu Samfylkingarinnar og meirihlutans í Reykjavík að vel sé tekið á móti innflytjendum í höfuðborginni.  

Mikilvægur mannauður

Um fimm hundruð erlendir starfsmenn eru starfandi hjá Reykjavíkurborg en auk þeirra eru mjög margir einstaklingar af erlendum uppruna, sem fengið hafa íslenskan ríkisborgararétt. Það er hagur okkar allra að þetta mikilvæga starfsfólk njóti menntunar sinnar og hæfni til fulls, rétt eins og aðrir, en mikið tap er fólgið í því að nýta ekki þá fjölbreyttu þekkingu og reynslu sem innflytjendur koma með til landsins.  Öll virkum við best ef við erum að vinna með okkar styrkleika og á okkar áhugasviði svo ekki sé talað um ef við erum að nýta menntun sem við höfum fjárfest í. Það ætti að vera markmið okkar að auðvelda fólki að fá menntun sína og reynslu metna, vissulega þarf að sækja um löggildingar í sumum tilfellum en þar geta vinnustaðir eins og Reykjavíkurborg gert enn betur en hingað til og aðstoðað fólk markvisst við að sækja um réttindi og lögvernduð starfsheiti.

Betri fjölmenningarleg þjónusta

Til þess að þjóna því fjölmenningarlega samfélagi sem Reykjavík er, er afar mikilvægt að hafa fólk af ólíkum uppruna í röðum starfsfólks. Fólk með fjölbreytta tungumálakunnáttu er til að mynda mikil auðlind enda eru innflytjendur í afar fjölbreyttum störfum hjá borginni.   

Stjórnendur hjá borginni eru leiðandi í mótun faglegra vinnubragða og menningarnæmni í samskiptum, enda er það á þeirra ábyrgð að innflytjendur fái stuðning í starfi og tækifæri til að auka þekkingu sína í þeim tilgangi að fá framgang í starfi eins og aðrir.

Með þjálfun og fræðslu er starfsfólk betur í stakk búið til að þjónusta innflytjendur og sérstök áhersla er lögð á að nýta þekkingu og reynslu innflytjenda í hópi starfsmanna. Menningarnæmni er einnig mjög mikilvæg í allri þjónustuveitingu, eins og meðal annars kom fram á ráðstefnu Þroskahjálpar um fötluð börn af erlendum uppruna.

Launamunur og jöfn tækifæri

Greining á launamun innflytjenda og innfæddra, sem Hagstofa birti í mars sl., sýnir að launamunur milli þessa hópa skýrist að stórum hluta af atvinnutengdum þáttum svo sem starfi, atvinnugrein, vinnutíma, reynslu og ábyrgð. Niðurstöðurnar benda einnig til þess að innflytjendur fái síður störf við hæfi og í samræmi við menntun þeirra. Þetta er auðvitað alveg óásættanlegt og mikilvægt að Reykjavíkurborg og samfélagið allt fari í samræmt átak til að eyða þessu óréttlæti.  

Reykjavíkurborg er stærsti vinnustaður landsins og sem slík getur hún haft gríðarleg áhrif á samfélagið allt og sýnt í verki hvernig auka má jöfnuð og jöfn tækifæri óháð uppruna eða þess lands sem einstaklingur menntar sig í. Þannig hefur borgin dregið vagninn í baráttunni gegn launamun kynjanna og þannig mun hún einnig varða brautina í málefnum fólks af erlendum uppruna.