Arion banki, viðskiptabanki WOW air og Skúla Mogensen, á veð í flestum fasteignum sem tengjast rekstri flugfélagsins og fasteignum tengdra félaga. Fasteignirnar voru meðal annars veðsettar á seinni hluta síðasta árs fyrir fjármagni sem notað var til að reyna að bjarga WOW air frá falli. 

WOW air hætti starfsemi í morgun og er ljóst að hluthafar flugfélagsins, þar með talið fyrrverandi skuldabréfaeigendur þess sem breyttu kröfum sínum í hlutafé, sem og kröfuhafar fyrirtækisins, meðal annars Arion banki, munu tapa fjármunum vegna falls félagsins.

Þá er ljóst að Skúli Mogensen, sem hefur verið eini eigandi WOW-air síðastliðin ár, mun tapa þeirri fjárfestingu sem hann réðist í, meðal annars þeim fjármunum sem hann notaði til að fjárfesta í skuldabréfaútboði WOW-air.  Í viðtali við fréttastofu RÚV í hádeginu sagði Skúli að hann hefði sett allt sitt í reksturinn: „Í setti aleiguna í þennan rekstur.“

Þrátt fyrir skuldbindingar WOW-air við Arion banka sendi bankinn frá sér tilkynningu í morgun þar sem fram kom að þær væru ekki svo miklar að áhrifin á bankann yrðu „veruleg“: „Í ljósi umfjöllunar í fjölmiðlum um málefni WOW Air og skuldbindingar félagsins við Arion banka vill bankinn taka fram að stöðvun rekstrar WOW Air mun ekki hafa veruleg bein áhrif á rekstrarafkomu bankans að teknu tilliti til annarra þátta í rekstri bankans.“

Ekki mikið höggArion banki, sem á veð í fasteignum Skúla Mogensen, segir að höggið út af falli WOW air sé ekki mikið. 

MYND: BERNHARD KRISTINN INGIMUNDARSON

„Stöðvun rekstrar WOW Air mun ekki hafa veruleg bein áhrif á rekstrarafkomu bankans“

Ný 733 milljóna króna lán

Eins og Stundin greindi frá í byrjun desember var nýjum skuldabréfum upp á samtals 733 milljónir króna, 5.7 milljónir evra, þinglýst á fasteignir í eigu félaga tengdum Skúla og WOW í september í fyrra en þetta var gert á sama tíma og skuldabréfaútgáfa WOW-air fór fram. 

Arion banki þinglýsti þá meðal annars 2,9 milljóna evra, 375 milljóna króna, tryggingabréfi á hótel á Suðurnesjum sem félagið TF-KEF ehf. á, og eins á fasteignir í Hvammsvík í Hvalfirði sem Skúli Mogensen á í gegnum félagið Kotasælu ehf.  Tryggingabréfið á hótelinu á Suðurnesjum er á þriðja veðrétti á eftir tveimur tryggingabréfum frá Arion upp á samtals 650 milljónir króna sem hvíla á fyrsta og öðrum veðrétti á því.

Arion banki þinglýsti einnig nýju tryggingabréfi upp á 2,77 milljónir evra, 358 milljónir króna, á heimili Skúla á Seltjarnarnesi sama dag. Engin veðbönd hvíldu á húsinu fyrir þetta.

Kotasæla afsalaði sér húsinu til Skúla í fyrra

Þegar Skúli veðsetti húsið í fyrra hafði hann ekki átt það mjög lengi því áður en hann eignaðist það persónulega í júlí 2018 var húsið skráð á eignarhaldsfélag hans, Kotasælu ehf. Þetta er sama eignarhaldsfélög og notað var til veðsetningar fyrir nýjum lánum frá WOW air. 

Í afsalinu er ekki tekið fram hvað Skúli greiddi Kotasælu ehf. fyrir húsið en þó kemur fram að kaupverðið sé að fullu greitt: „Þar sem afsalshafi hefur að fullu greitt umsamið kaupverð eignarinnar fyrir hina seldu eign lýsi afsalsgjafi hann lögfullan eiganda að eigninni,“ segir í afsalinu. 

Í ársreikningi Kotasælu fyrir árið 2017 kemur hins vegar fram að Kotasæla ehf. hafi skuldað Skúla Mogensen tæplega 150 milljónir króna í árslok 2017. Auk þess voru tæplega 660 milljóna króna skuldir við félög í eigu Skúla Mogensen. Þá átti félagið kröfur á hendur WOW air ehf. upp á rúmlega 250 milljónir króna

Miðað við þetta er líklegt að Kotasæla ehf. og Skúli hafi gert samkomulag um skuldajöfnun þannig að Skúli fengi húsið upp í kröfur sínar á hendur félaginu. 

Bæði eftirstandandi fasteignir Kotasælu ehf. og eins húsið á Seltjarnarnesi voru svo notuð til veðsetningar í fyrrahaust þegar WOW air og Skúla vantaði fjármuni eftir að WOW-air lenti í erfiðleikum.

Hvað verður um þessar eignir, sem og aðrar eignir sem Arion banki og aðrir kröfuhafar WOW air eiga veð í, er eitt af því sem á eftir að koma í ljós við skuldauppgjör WOW air og Skúla Mogensen við kröfuhafa sína næstu misserin.