Fjölmiðlaverðlaun götunnar voru á dögunum veitt Gabríel Benjamin og Jóni Bjarka Magnússyni á Stundinni auk starfsmanna Kveiks hjá RÚV. Alls voru veitt þrenn verðlaun, en fimmtán umfjallanir frá fjórum miðlum um fátækt voru tilnefndar til verðlauna. Stundin hreppti fyrsta og þriðja sætið, og var þar að auki með flestar tilnefningar, eða sex talsins.
Unnu tvenn verðlaun
Grein Gabríels Benjamin á Stundinni, „Öryrkjar enn og aftur látnir sitja á hakanum“, bar sigur úr býtum í ár. Dómnefndin segir að greinin hafi verið „mikilvæg og þörf grein sem afhjúpar annmarka starfsgetumatsins og varpar ljósi á þær afleiðingar sem það hefur haft í för með sér í öðrum löndum.“ Hún segir þar að auki að greinin hafi verið „faglega unnin og upplýsandi umfjöllun sem kemur sýn öryrkja vel til skila“.
Helgi Seljan, Aðalsteinn Kjartansson og Stefán Drengsson fengu annað sætið fyrir Kveik-þáttinn „Svarta hliðin á íslenskum vinnumarkaði“, þar sem skyggnst er inn í veruleika erlends verkafólks sem heldur góðærinu uppi. „Mikilvæg og yfirgripsmikil umfjöllun sem vakti almenning til vitundar um falið vandamál, nútímaþrælahald í íslensku samfélagi, sem augljóslega skortir á eftirlit með,“ segir dómsnefndin.
Viðtal Jóns Bjarka Magnússonar, „Með þrjár háskólagráður og í fullu starfi, en samt í fjárhagslegum nauðum“, hlaut þriðja sætið fyrir að lýsa „því valdaleysi og vonleysi sem fylgir því að festast í fátæktargildrunni“. Dómnefndin segir að greinin „lýsi[r] daglegri baráttu sem margir standa í og þeim fáránleika að menntun skili sér ekki í öruggri afkomu“.
Verkefni Öldu Lóu Leifsdóttur, „Fólkið í Eflingu“, auk verkefnis Eflingar, „Líf á lægstu launum“, fengu sérstakar viðurkenningar. Bára Halldórsdóttir var þar að auki sérstaklega heiðruð sem „Uppljóstrari götunnar“ fyrir framlag sitt til Klaustursmálsins og umfjöllun hennar um fátækt í gegnum árin.
Fjölmiðlaverðlaun götunnar eru veitt árlega til fjölmiðlafólks sem fjallar um fátækt á Íslandi af kostgæfni og virðingu af Pepp-samtökum fólks sem fæst við fátækt og félagslega einangrun. Pepp-samtökin eru grasrótarhreyfing fólks með reynslu af fátækt og hluti af EAPN á Íslandi. Verðlaunaumfjallanir hafa því verið metnar af sérfræðingum á því sviði, af fólki sem hefur búið við fátækt.
Verðlaunaafhendingin fór fram þann 22. febrúar í húsnæði Hjálpræðishers Reykjavíkur. Hér fyrir neðan má lesa greinar Stundarinnar sem voru tilnefndar, raðað eftir útgáfudegi.
1 „Nýtt úrræði fyrir eldri borgara nýtist best vel stæðum körlum“
Gabríel Benjamin greinir nýtt úrræði sem félags- og barnamálaráðherra kynntu um sveigjanlega töku ellilífeyris. Tæplega 30% ellilífeyrisþega gætu nýtt þetta úrræði, en það hentar best vel stæðum körlum.
Stundin, 12. janúar 2018
2 „Þegar lúxemborgskt skúffufélag eignaðist heimilin okkar“
Jón Bjarki Magnússon lýsir reynslu sinni af því þegar lúxemborgskt skúffufélag með yfirlýsta markmiðið að hækka leiguverð keypti íbúðablokkina sem hann býr í í Berlín, Þýskalandi. Íbúar börðust gegn sölunni.
Stundin, 9. febrúar 2018
3 „Niðurlægð og svikin á Hótel Adam“
Gabríel Benjamin greinir sögu Kristýnu Králová, tékkneskrar konu sem var lykilstarfsmaður á Hótel Adam. Hún lýsir kynferðislegri áreitni eigandans, en hann var dæmdur til að borga henni tæpar þrjár milljónir vegna vangoldinna launa. Í kjölfar umfjöllunar Stundarinnar var hótelinu lokað að kröfu sýslumanns.
Stundin, 13. júlí 2018
4 „Koma fram við okkur eins og við séum eign þeirra“
Gabríel Benjamin fjallar um starfslok starfsmanna Oddsson Hostel sem segjast hafa fengið misvísandi skilaboð frá yfirmönnum sínum um hvort þau fái borgað eða ekki þegar hótelinu verður lokað. Starfsfólkið lýsir miklum kvíða og óvissu um framtíð sína.
Stundin, 28. september 2018
5 „Öryrkjar enn og aftur látnir sitja á hakanum“
Gabríel Benjamin fjallar um starfsgetumatið sem ríkisstjórn virðist ætla að taka upp, þrátt fyrir að gefa annað í skyn í ríkissáttmála sínum. Formaður Öryrkjabandalagsins segir blaðamanni að það sé verið að reyna að neyða öryrkja og bandalagið til að samþykkja þetta umdeilda nýja kerfi með því að halda aftur kjarabótum þeirra.
Stundin, 7. desember 2018
6
„Með þrjár háskólagráður og í fullu starfi en samt í fjárhagslegum nauðum“
Jón Bjarki Magnússon tekur viðtal við móður í fullu starfi sem er að bugast á íslenskum leigumarkaði sem hún segir að sé að murka úr sér lífið. Hún er í þessari stöðu þrátt fyrir að vera vel menntuð og furðar sig á aðgerðarleysi stjórnvalda.
Stundin, 21. desember 2018
Aðrar tilnefningar voru:
Kristjana Guðbrandsdóttir – Fréttablaðið:
„Öðruvísi fátækt í Reykjavík en í Ekvador“. (Fréttablaðið, 5. maí, 2018)
„Vill ekki verða tamin millistéttarkona í dragt“. (Fréttablaðið, 2. júní, 2018)
„Látum ekki hafa okkur að fíflum“. (Fréttablaðið, 3. mars 2018)
Aðalheiður Ámundadóttir – Fréttablaðið
„Fallvalt frelsi Mirjam“. (Fréttablaðið, 1. september, 2018)
Viktoría Hermannsdóttir – Rás 1
„Saga fyrrum vændiskonu“. (Málið er, 7. desember, 2018)
Sigríður Halldórsdóttir – RÚV, sjónvarp
„Ég átti ekki í nein hús að venda“. (Kveikur, 13. mars 2018)
Fyrirvari við umfjöllun: Stundin fjallar hér um atburði þar sem fjölmiðillinn sjálfur er viðfangsefni.
Athugasemdir