Spyr hvort „ofsinn á samfélagsmiðlum“ hafi þrýst upp leiguverði

Ásgeir Jónsson, dós­ent við hag­fræði­deild Háskóla Íslands sem gegnt hefur hlut­verki for­seta deild­ar­innar und­an­farin ár, spyr hvort „ofs­inn á sam­fé­lags­miðlum“ hafi fælt fjár­festa frá leigu­fé­lag­inu Heima­völlum og ýtt upp leigu­verði. Þetta kemur fram í færslu sem hann birtir á Facebook. 

Ásgeir seg­ist hafa fengið hörð við­brögð þegar hann flutti erindi á morg­un­verð­ar­fundi Heima­valla í febr­úar 2018. Stundin fjall­aði um erindið á sínum tíma, en þar var­aði Ásgeir við því að opin­berir aðilar færu í sam­keppni við einka­að­ila eins og Heima­velli eða GAMMA á leigu­mark­aðnum. Ásgeir var áður efna­hags­ráð­gjafi hjá Gamma sem rak Almenna leigu­fé­lagið. Hann greindi frá því í við­tali við Stundina að hann ynni ekki lengur fast fyrir neina hags­muna­að­ila á leigu­mark­aði. 

„Það var líkt og ég hafði talað hjá glæpa­fé­lagi — tugir rit­uðu ummæli um mig á sam­fé­lags­miðlum sem voru ekki við hæfi móður minnar,“ skrifar Ásgeir í pistli sínum í dag. Hann bendir á að nú liggi fyrir að Heima­vellir verði afskráðir og íbúðir félags­ins mögu­lega teknar úr leigu og seldar, enda hafi hreinar leigu­tekjur Heima­valla ekki dugað fyrir fjár­magns­kostn­aði. 

„Sá sem hér ritar beygir ekki skafl þó net­verjar hafi um hann orð sem mömmu hans myndi sárna. Það er hins vegar áleitin spurn­ing hvort þjóð­fé­lags­um­ræðan hafi fælt fjár­festa frá Heima­völlum – einkum þó líf­eyr­is­sjóð­ina. Ef það er satt — er ofs­inn á sam­fé­lags­miðlum að leiða til hærri leigu — þar fram­boð á leigu­hús­næði minnkar við brott­hvarf Heima­valla og ávöxt­un­ar­krafa félags­ins hlýtur að vera við­mið fyrir alla þá hyggj­ast leigja út hús­næði.“ 

Ásgeir segir að Ísland þurfi á sterkum hagn­að­ar­drifnum leigu­fé­lögum að halda. Leigan sé há, en ástæða þess sé sú að Ísland er hávaxta­land og fram­boð á nýjum íbúðum tak­markað. „Ýmsar leiðir eru til þess að breyta því — aðrar en glæpa­gera þá sem leigja út hús­næði.“

Þetta er ekki í fyrsta skipti sem Ásgeir tjáir sig um þá hörðu útreið sem hann seg­ist verða fyrir á sam­fé­lags­miðlum og í kommenta­kerfum. Árið 2017 harm­aði Ásgeir hve fátæk­legar við­tökur bók hans um hrunið, Why Iceland?, hefði fengið þegar hún kom út árið 2009. Ásgeir hafði þá um ára­bil starfað sem aðal­hag­fræð­ingur Kaup­þings og for­stöðu­maður grein­inga­deildar bank­ans.

„Virkum í athuga­semdum – sem voru mjög margir á þessum tíma – fannst að það hefði átt að banna mér að skrifa svona bók en fyrst að skað­inn var skeður ætti fólk að sam­ein­ast um að kaupa hana ekki,“ skrif­aði hann í frétta­blaði frá Virðingu hf. „Virkir athuga­semdir eltu mig jafn­vel til útlanda ef ég tók þátt í ráð­stefnum þar ytra og reyndu að leiða óstað­kunn­ugt fólk í allan sann­leika um hvaða mann ég hefði að geyma, en það er önnur saga.“ Sagði Ásgeir að síðan þá hefði „virkum í athuga­semdum fækkað all­mikið sem hlyti að „bera vott um bætt atvinnu­á­stand“.