Hringbraut birti frétt í gær um að meðal áhrifamanna í Sjálfstæðisflokknum og Framsóknarflokknum stæði vilji til þess að slíta stjórnarsamstarfinu við Vinstri græn og hefja samstarf við Miðflokkinn í staðinn. Stefnt væri að slíkum breytingum eftir að kjarasamningum á almennum vinnumarkaði lyki en til að hægt væri að mynda stjórnarmeirihluta þyrftu óháðu þingmennirnir Ólafur Ísleifsson og Karl Gauti Hjaltason að ganga í Miðflokkinn eða styðja stjórnina. Bjarni Benediktsson gæti orðið forsætisráðherra og Sigmundur Davíð Gunnlaugsson utanríkisráðherra.
Skrifin vöktu nokkra kátínu á samfélagsmiðlum áður en þau hurfu af yfirborði jarðar. Gunnar Smári Egilsson, fyrrverandi ritstjóri, hafði á orði að svo virtist sem Hringbraut hefði „tekið að sér að skrifa fréttaskýringar af Klausturbarnum, samfélagsumfjöllun á fimmtánda glasi“. „Svona dreymir sauðdrukkna miðaldra karla um það leyti að þeir þeir missa minnið. Svo vakna þeir 36 tímum seinna, hafa týnt fötunum og skilja ekkert í veröldinni sem þeir lifa innan.“
Í greininni á vef Hringbrautar kom fram að Sjálfstæðismönnum hefði „almennt liðið mjög illa með að vera í ríkisstjórnarsamstarfi við Vinstri græna undir forsæti þeirra“ og það þætti „dapurlegt hlutskipti“ fyrir flokkinn. Þá kom fram að ýmsir áhrifamenn í Framsóknarflokknum væru sagðir eiga sér þann draum að takast mætti að sameina „systurflokkana Framsókn og Miðflokkinn“. Flokkarnir hefðu sams konar stefnu og sæktu fylgi í sömu hópa. „Innan Miðflokks eru einnig gamlir framsóknarmenn sem vinna að sáttum. Forsenda fyrir sáttum er talin vera sú að flokkarnir séu sömu megin við borðið, annað hvort báðir í stjórn eða báðir í stjórnarandstöðu.“
Stundin sendi Hringbraut fyrirspurn um fréttina. Fram kemur í svari að um hafi verið að ræða pistil sem hafi óvart vistast sem frétt. Ef vel er að gáð má nú finna pistil á vef Hringbrautar undir dálkinum Dagfari, svipaðan þeim sem áður birtist sem frétt.
Fjölmiðlamál
Öll stærri einkarekin fjölmiðlafyrirtæki rekin með tapi fyrir greiðslu fjölmiðlastyrkja
Hundruð milljóna taprekstur fjölmiðla telst ekki til fjárhagserfiðleika
Kolbrún og Kristín óska eftir rökstuðningi frá RÚV
Tengja uppsagnir hjá Morgunblaðinu við kjarabaráttu: „Þér kemur einfaldlega ekkert við hvað ég er með í laun“
Eyþór Arnalds: „Ósæmilegt að segja að Samherji sé einhvers konar mútufélag“
Athugasemdir