Páll Magnússon, þingmaður Sjálfstæðisflokksins, vænir Dag B. Eggertsson um kvenfyrirlitningu í garð Hildar Björnsdóttur í færslu á Facebook. Ástæðan er yfirlýsingar Dags í fjölmiðlum um þá kröfu Hildar að hann víki sæti í þriggja manna nefnd sem fara á yfir skýrslu innri endurskoðunar Reykjavíkurborgar vegna braggamálsins.

Dagur lýsti því í viðtali við Ríkisútvarpið að hann teldi að krafa Hildar um að hann víki úr nefndinni væri tilkomin vegna þess að það hefði mælst illa fyrir innan ákveðins hluta baklands Sjálfstæðisflokksins að Hildur sjálf tæki þátt í vinnu nefndarinnar. Umrædd harðlínuöfl vilji ekkert samstarf milli meirihluta og minnihluta í borgarstjórn og noti þetta tilefni til að þyrla upp moldviðri og gera það að pólitísku upphlaupsmáli.

Páll segir að orð Dags beri með sér, ef ekki hreina kvenfyrirlitningu þá í það minnsta lítilsvirðingu af hálfu borgarstjóra og spyr hvort slíkt sé boðlegt. Hildur hafi fært fullkomlega málefnaleg rök fyrir því að af hverju borgarstjóri ætti ekki að vera þátttakandi í vinnu umræddrar nefndar, þar sem felldir séu áfellisdómar um hann sjálfan í skýrslu innri endurskoðunar. „Að borgarstjórinn skuli brigsla Hildi um að lúta einhverjum huldumönnum úti í bæ er lítilmótlegur málflutningur af hans hálfu.“