Anna Kolbrún Árnadóttir, þingmaður Miðflokksins, hyggst ekki segja af sér í kjölfar Klaustursupptakanna. Þetta staðfestir hún í samtali við Morgunblaðið.

„Ég geri mér grein fyr­ir því að ég lét þetta viðgang­ast,“ segir Anna. „En á sama tíma geri ég mér fulla grein fyr­ir því að það er ekki á mína ábyrgð að stoppa það þegar drukkn­ir menn tala. Ég hefði átt að fara fyrr en ég gerði. Það eru al­veg ótrú­lega mörg „Ég hefði“.“

Anna náðist á upptöku ásamt þremur flokksbræðrum sínum og tveimur þingmönnum Flokks fólksins á Klaustri bar 20. nóvember síðastliðinn. Orðaskiptin voru mjög hávær og áttu sér stað í vitna viðurvist.

Í viðtali við RÚV á fimmtudag sagðist Anna Kolbrún ekki eiga sér málsbætur. „Ég ætla að hugsa mjög vel mína stöðu,“ sagði hún.

Á upptökunum má heyra Önnu Kolbrúnu taka þátt í að gera grín að Freyju Haraldsdóttur, fyrrverandi varaþingkonu, vegna fötlunar hennar. Þá tekur hún undir gagnrýni á Ingu Sæland, formann Flokks fólksins, en er sú eina viðstödd sem grípur til varnar þegar hinir þingmennirnir gera lítið úr kvenkyns þingmönnum.

Í viðtalinu við Morgunblaðið seg­ist hún aldrei hafa grátið jafn­mikið á æv­inni og und­an­farna daga og hafi meðal annars brostið í grát á fundi formanna þing­flokk­anna í gær. „En ég er hætt að vera hrædd við að gráta. Það er alltaf ætl­ast til þess að fólk fari allt á hnef­an­um og sýni hvorki til­finn­ing­ar né veik­leika­merki. Af hverju má ekki sýna til­finn­ing­ar?“

Miðflokkurinn þurrkist af þingi

Fréttablaðið birti í dag könnun Zenter rannsókna um fylgi stjórnmálaflokkanna. Samkvæmt henni fengi Miðflokkurinn 4,3% fylgi og næði ekki manni á þing. Yrði það rúmlega þriðjungur kjörfylgis flokksins. Könnunin var framkvæmd 3.-4. desember, eftir að upptökurnar voru gerðar opinberar.

Sjálfstæðisflokkurinn mælist stærstur með 21,4% og Samfylkingin fast á hæla hans með 20,8%. Píratar mælast þriðji stærsti flokkurinn með 14,4% og Vinstri græn þar á eftir með 12,7%.

Þá mælist Viðreisn með 9,1%, Framsóknarflokkurinn með 8,5% og Flokkur fólksins með 5,7%.