Sigmundur Davíð Gunnlaugsson, formaður Miðflokksins og fyrrverandi forsætisráðherra, verður gestur á „karlakaffi“ í Fella- og hólakirkju á morgun.

„Föstudaginn 30. nóvember er síðasta karlakaffi okkar á þessu ári. Gestur okkar að þessu sinni er fyrrum forsetisráðherra og núverandi formaður Miðflokksins, Sigmundur Davíð Gunnlaugsson,“ segir í tilkynningu frá starfsfólki kirkjunnar.

„Við bjóðum upp á kaffi og vínabrauð, spjall og góða samveru. Láttu sjá þig, við tökum hlýlega á móti ykkur.“

Sigmundur Davíð var valinn einn fremsti karlkynsfemínisti heims af Financial Times árið 2015. Undanfarinn sólarhring hefur Stundin birt fréttir af orðaskiptum hans og fleiri þingmanna sem áttu sérstað á Klaustur Bar.

Þar tók Sigmundur til að mynda undir með Bergþóri Ólasyni kollega sínum um að Inga Sæland, formaður Flokks fólksins, væri „húrrandi klikkuð kunta“.

Þá sagði Sigmundur að kona, sem þeim körlunum þótti ekki jafn „hot“ og áður, hlyti þess vegna að „hrynja niður“ prófkjörslista.