Sjónarmið Ásmundar Friðriksson og skrif „sem andstæðingar hans kalla rasistagreinar“ eiga upp á pallborðið í Suðurkjördæmi, að mati Ólafs Ísleifssonar, þingmanns Flokks fólksins. Þetta kemur fram á hljóðupptöku sem Stundin er með undir höndum.

„Ásmundur Friðriksson er ekki maður að mínu skapi,“ sagði Ólafur á upptökunni. „Þið takið eftir því að það er einn þáttur í honum sem stjórnmálamanni og það er það að hann hefur treyst sér til að fjalla um mjög viðkvæm málefni, sem „góða fólkinu“ er mjög á móti skapi.“ 

Ásmundur hefur sem þingmaður Sjálfstæðisflokksins vakið töluverða athygli fyrir málflutning sinn varðandi innflytjendur og hælisleitendur. Ummæli hans um málaflokkinn hafa sætt mikilli gagnrýni og þótt á skjön við það sem íslenskir stjórnmálamenn hafa látið hafa eftir sér opinberlega.

„Og þegar hann er þarna í sínu öðru sæti [á lista flokksins] að skrifa það sem andstæðingar hans kalla rasistagreinar. Ein slík grein hefði mögulega getað dregið Unni Brá [Konráðsdóttur, fyrrverandi þingmann] í framboð. Hennar eini séns var að Ásmundur mundi herða á sínu. Það er augljós markaður fyrir þessi sjónarmið í Suðurkjördæmi. Það kom mjög skýrt fram í þessu fjölmennasta prófkjöri sem haldið var fyrir kosningarnar.“

Mistök að hætta að keyra

Sigmundur Davíð Gunnlaugsson, Gunnar Bragi Sveinsson, Bergþór Ólason og Anna Kolbrún Árnadóttir voru á Klaustur bar 20. nóvember síðastliðinn og ræddu við Ólaf og Karl Gauta Hjaltason, þingmenn Flokks fólksins, um að ganga í Miðflokkinn. Orðaskiptin voru mjög hávær, áttu sér stað í vitna viðurvist og náðust að hluta á upptöku.

Áður en sjónarmið Ásmundar í innflytjendamálum bárust í tal höfðu þingmennirnir rætt aksturskostnað hans og hvort hann hefði brugðist rétt við gagnrýni sem hann hlaut í byrjun árs. Ásmundur vakti athygli fyrir 4,6 milljóna króna endurgreiðslur vegna aksturskostnaðar síns árið 2017.

„Feillinn sem Ási gerði var að hætta að keyra,“ sagði þá Anna Kolbrún. „Hann helmingaði aksturinn á milli ára. Hann játaði sökina.“

Ásmundur byrjaði í kjölfar gagnrýninnar að nota bílaleigubíl í stað síns eigin bíls, samkvæmt reglum Alþingis. Í framhaldinu af þessum umræðum sagðist Bergþór í kerskni hafa heyrt þá hugmynd að Ásmundur hefði átt að setja bílaleigubílinn á búkka í bílskúrnum.

„Þar væri hann á 100 kílómetra hraða alltaf þegar hann væri sofandi. Þannig að hverja nótt þegar Ási er sofandi þá keyrir bíllinn svona 700 kílómetra. Þannig að hann mun sýna okkur það að hann keyrir jafnvel meira.“

„Hann virkar hræddur almennt,“ sagði Sigmundur Davíð loks.