Sævar Helgi Bragason, Stjörnu-Sævar, segir það mikil vonbrigði að björgunarsveitirnar ætli í engu að bregðast við ákalli fjölda fólks um aðgerðir til að draga úr mengun af völdum flugelda um komandi áramót. Markaðs- og sölustjóri Landsbjargar lýsti því í fjölmiðlum í morgun að sala á flugeldum yrði óbreytt af hálfu björgunarsveitanna.

Sævar Helgi hefur talað fyrir því um nokkurt skeið að sala á flugeldum til almennings verði bönnuð, eða í það minnsta að settar verði mun strangari reglur þar um.

„Ég skil þá mætavel af því þetta er aðal fjáröflunarleið björgunarsveitanna. Um leið þá eru það pínu vonbrigði vegna þess að mér finnst að fólk eigi almennt að sýna ábyrgð, sérstaklega þegar að slík mengun varð eins og hérna síðustu áramót, að bregðast við og reyna að finna leiðir til að minnka hana að minnsta kosti.“ 

„Þannig að ef að börn eru úti á þessum tíma þá eru þau jafnvel að skaða lungun sín fyrir lífstíð“

Sævar Helgi gefur lítið fyrir að aðrir mengunarvaldar en flugeldar séu stór áhrifaþáttur í mengun á nýársnótt og gamlársdag. Vissulega geti brennur haft einhver áhrif en þau séu margfalt minni en sú mikla mengun sem fylgi flugeldunum.

„Vandamálið er líka það að það eru ekki endilega bara efnin, þessir hættulegu þungmálmar og ýmislegt annað sem finnst í þessu, heldur er þetta ryk líka svo rosalega fínt að það smýgur inn í lungun á fólki og ekki bara fólki, börn eru í sérstakri hættu vegna þess að þau anda hraðar. „Þannig að ef að börn eru úti á þessum tíma þá eru þau jafnvel að skaða lungun sín fyrir lífstíð.“

Sævar Helgi leggur til að bæjarfélög eða björgunarsveitir standi fyrir flugeldasýningum á gamlárskvöld, á völdum stöðum, í stað þess að allur almenningur kaupi flugelda sem hverfi í sprengiryki. Hann hvetur almenning til að styrkja björgunarsveitirnar beint með þeirri upphæð sem það hefði hugsanlega notað til að kaupa flugelda.

Aðspurður hvort hann lumi á hugmyndum til að draga úr hættunni sem af flugeldum stafar svarar Sævar Helgi afdráttarlaust og bendir á að björgunarsveitirnar flytji inn og selji öryggisgleraugu.

„Miðað við mengunina og allan þann viðbjóð sem fylgir þessu þá væri kannski ekkert vitlaust að þeir myndu gefa með einhvers konar rykgrímur eða súrefnisgrímur, sérstaklega fyrir börn sem þurfa að anda þessu ógeði að sér.“