Ritstjóri Morgunblaðsins, grípur til varnar fyrir Donald Trump Bandaríkjaforseta í ritstjórnargrein í blaðinu í dag. Hann segir sigur demókrata í þingkosningum ekki athyglisverðan í sögulegum skilningi og að flokkurinn hafi flæmt frá sér kjósendur með því að láta rannsaka ásakanir um að  dómaraefni hafi framið kynferðisbrot.

Demókratar náðu meirihluta í fulltrúadeild Bandaríkjaþings í kosningunum sem fram fóru á þriðjudaginn. Í öldungardeildinni bættu repúblikanar við sig þremur sætum, þrátt fyrir að hafa fengið 13 milljónum færri atkvæði en demókratar. Ástæðan er að hvert ríki fær tvo öldungardeildarþingmenn, óháð mannfjölda.

Ritstjórnargreinar Morgunblaðsins eru nafnlausar en ætla má að Davíð Oddsson skrifi þær. Ber hann ábyrgð á blaðinu sem ritstjóri ásamt Haraldi Johannessen. Morgunblaðinu var dreift frítt í dag inn á heimili.

„Flestir öflugustu fjölmiðlar landsins hafa hamast gegn Trump forseta af miskunnarleysi og furðulega hömlulaust frá því að eigendur þeirra og ritstjórnir vöknuðu upp við þann vonda draum að þeirra frambjóðandi, Hillary Clinton, tapaði fyrir honum þvert á spár,“ segir í greininni. „Eiginkona hans og börn hafa verið elt á röndum og sætt harðri gagnrýni fyrir hvað eina og er fróðlegt að bera það saman við dekur fjölmiðlanna við sambærilegar fjölskyldur úr þóknanlegum áttum,“ segir í leiðaranum. 

Beinir höfundur næst spjótum sínum að Ríkisúvarpinu. „Þessi fjölmiðlun hefur smitast víða og var með nokkrum ólíkindum að hlusta á talsmáta sérfræðings frá H.Í. í aðalfréttatíma „RÚV“, hins fræga „öryggisventils“ þjóðarinnar, um kosningaúrslitin. Var það hvergi nærri því að vera boðlegt.“

Trump hefur ítrekað kallað fjölmiðla „óvini fólksins“. Á miðvikudag lét hann banna Jim Acosta, fréttamann CNN, frá Hvíta húsinu fyrir að spyrja hann óþægilegra spurninga á fréttamannafundi.

Kavanaugh „vammlaust dómaraefni“

Í greininni segir að úrslitin verði að skoðast í því samhengi að venjulega tapi sá flokkur sem fer með forsetaembættið þingsætum í þingkosningum sem fari fram tveimur árum síðar. Demókrötum hefði hins vegar gengið mun betur ef ekki hefði verið fyrir rannsókn á ásökunum um kynferðisbrot á hendur Brett Kavanaugh sem Trump tilnefndi til setu í hæstarétti.

„Yfirgengilegar árásir þeirra á vammlaust dómaraefni til hæstaréttar Bandaríkjanna sneru blaðinu við,“ segir í greininni. „Sú aðferð þeirra að fallast með hávaða á hvaða ásökun um vemmilega glæpi sem birt var þótti mörgum handan við öll mörk. Nú er komið í ljós að um hreinan uppspuna var að ræða í öllum tilvikum nema hugsanlega einu.“

Brett Kavanaugh og Donald TrumpMiklar deilur stóðu um tilnefningu Trump á Kavanaugh í embætti hæstaréttardómara í haust.

Virðist greinahöfundur þar vísa til eigin orða Trump, sem sagði í ræðu á mánudag að kona sem ásakaði Kavanaugh hafi reynst vera að ljúga. „Það athæfi að heill stjórnmálaflokkur af stærri gerðinni taki þá afstöðu að sérhver „ásökun væri mjög trúverðug“ (!) og því væri það dómaraefnisins að sanna sakleysi sitt fyrir umheiminum flæmdi kjósendur frá demókrötum.“

Trump nefndi ásakandann ekki á nafn

Þrjár konur hafa stigið fram opinberlega undir nafni og ásakað Kavanaugh fyrir kynferðisbrot. Kvöldið fyrir kosningarnar á þriðjudag sagði Trump í ræðu að kona sem ásakaði Kavanaugh um tilraun til nauðgunar hafi dregið ásökunina til baka.

„Sú sem ásakaði Brett Kavanaugh, mann sem er mjög góður maður, sú sem ásakaði viðurkenndi að hafa aldrei hitt hann, aldrei séð hann, hann hafi aldrei snert hana, talað við hana, hann hafði ekkert með hana að gera, hún bjó söguna til. Það var fölsk ásökun, það var svindl, það var falskt, það var allt falskt,“ sagði Trump við stuðningsmenn sína í Missouri.

Virtist hann þar eiga við Dr. Christine Blasey Ford, þá einu af ásakendunum sem bar vitni gegn Kavanaugh fyrir Bandaríkjaþingi og mest hefur verið til umfjöllunar í fjölmiðlum. Hann nefndi hana þó viljandi aldrei á nafn þar sem hann var að vísa til fjórðu konu sem ekki bar vitni, hafði lítið verið nefnd opinberlega, en á að hafa sent uppspunnið bréf til þingnefndarinnar „til að fá athygli“, segir í New York Times.