Kolbeinn Óttarsson Proppé og Steinunn Þóra Árnadóttir, þingmenn Vinstri grænna, gagnrýna harðlega að heræfingar NATO fari fram á Íslandi og segja að þær séu æfing í að drepa fólk. „Ef fleiri tækju skýra afstöðu gegn hernaðarbandalaginu, þá væru þessar morðæfingar ekki reglulega haldnar hér á landi,“ skrifar Kolbeinn á Facebook og Steinunn tekur í sama streng: „Nú berast fregnir af heræfingum á Suðurlandi í næsta mánuði. Það er ein af mörgum ljótum birtingarmyndum þess að Ísland er aðili að Nató.“

Varnaræfing Atlantshafsbandalagsins, Trident Juncture 2018, verður haldin á Norður-Atlantshafi, í Noregi og á Íslandi í október og nóvember næstkomandi. Um er að ræða stærstu varnaræfingu bandalagsins frá 2015. Um fjörutíu þúsund hermenn og borgaralegir sérfræðingar munu taka þátt í aðalæfingunni í Noregi, sem hefst 25. október og stendur til 7. nóvember. Fyrst fer hins vegar fram smærri æfing á Íslandi undir merkjum Trident Juncture 2018. „Hún verður haldin þann 16. október í Sandvík, nærri Höfnum í Reykjanesbæ, og á öryggissvæðinu á Keflavíkurflugvelli. 400 manna bandarískt landgöngulið æfir lendingu í Sandvík en um 120 hundrað landgönguliðar verða fluttir með þyrlum á öryggissvæðið þar sem æfð verða viðbrögð við árás á stjórnstöð Landhelgisgæslu Íslands,“ segir í tilkynningu á vef Stjórnarráðsins.

„Friðarpólitík og andstaða við hernað hefur alltaf verið ein af grunnstoðum minnar pólitísku sannfæringar“

Mynd: Pressphotos

„Friðarpólitík og andstaða við hernað hefur alltaf verið ein af grunnstoðum minnar pólitísku sannfæringar,“ skrifar Kolbeinn Proppé, þingmaður Vinstri grænna, á Facebook. Hann segist hafa verið félagi í Samtökum hernaðarandstæðinga frá því hann hafði aldur til, setið þar í miðnefnd og skrifað í og verið í ritnefnd Dagfara. 

„Ég hef ekki tölu á þeim mótmælum gegn hernaðarbrölti sem ég hef tekið þátt í á ævinni og ég náði í skottið á Keflavíkurgöngunum. Ég áskil mér allan rétt til áframhaldandi mótmæla og nú verða heimatökin hæg, þar sem 400 hermenn verða á mínum heimaslóðum í Þjórsárdal. Heræfingar eru ekki spennandi leikur fólks með framúrstefnuleg tól. Þetta er æfing í að drepa annað fólk. Við, sem metum líf annarra, eigum að vera á móti slíku, enda á maður ekki að drepa annað fólk.“ Kolbeinn segir að æfingin á Íslandi sé afleiðing af því að aðrir flokkar á Alþingi séu hlynntir áframhaldandi veru Íslands í NATO. „Ef fleiri tækju skýra afstöðu gegn hernaðarbandalaginu, þá væru þessar morðæfingar ekki reglulega haldnar hér á landi.“

Trufluðu heræfinguFjöldi friðarsinna truflaði heræfingu á Henglinum árið 2001.

Mynd: Af Facebook-síðu Steinunnar Þóru

Steinunn Þóra Árnadóttir er einnig ósátt með heræfinguna og birtir mynd sem tekin var fyrir 17 árum þegar hún og fleiri friðarsinnar trufluðu heræfingar sem haldnar voru í Henglinum. 

„Andstaðan við stríð og hermennsku er öðru fremur það sem rak mig út í pólitík. Fátt er ógeðfelldara en heræfingar – því þrátt fyrir það hvernig reynt er að kynna þær snúast þær þegar öllu er á botninn hvolft um það að æfa sig í því að drepa aðrar manneskjur,“ skrifar Steinunn og bætir því við að heræfingar séu sóun á fjármunum og hafi mengandi og skaðleg áhrif á náttúru og lífríki. 

„Frá því að ég byrjaði i pólitík hef ég talað fyrir því að Ísland segi sig úr Nató. Því miður hefur það verið minnihlutasjónarmið á þingi. Ég mun samt halda áfram að tala fyrir friði og gegn hernaðarhyggju og því sem henni fylgir.“