Konur og nýfædd börn þeirra verða útskrifuð beint af fæðingarvakt Landspítala Íslands og í heimaþjónustu sé þess kostur eftir 1. júlí næstkomandi. Þá er mögulegt að röskun verði á framköllun fæðinga, svokallaðri gangsetningu eftir mánaðamótin. Ástæðan er að um mánaðarmótin taka gildi uppsagnir tólf ljósmæðra vegna kjaradeilu Ljósmæðrafélags Íslands og ríkisins. Mikil truflun verður á starfsemi fæðingarþjónustu vegna þessa.
Landspítalinn hefur sett upp aðgerðaáætlun sem kemur til framkvæmda taki uppsagnirnar gildi. Áfram verður tekið á móti konum í fæðingu eins og verið hefur en, sem fyrr segir, má búast við að þær og nýburar þeirra verði útskrifuð beint í heimaþjónustu af fæðingarvakt ef hægt er. Þá verður fimm rúmum lokað á meðgöngu- og sængukvennadeild. Hugsanlegt er að valkeisaraskurðum verði beint á Akranes og Akureyri.
Barnshafandi konum er þá bent á að leita fyrst á heilsugæslustöð eða Læknavaktina, nema ef um bráð veikindi eða byrjun fæðingar sé að ræða. Þá er konum sem nýlega hafa fætt barn einnig bent á að leita á sína heilsugæslustöð, til heimaþjónustuljósmóður eða á Læknavakt, nema ef um bráð veikindi er að ræða.
Landspítali hefur undirbúið aukna samvinnu milli deilda spítalans og biðlað til annarra heilbrigðisstofnana um aðstoð. Heilsugæsla höfuðborgarsvæðisins, Heilbrigðisstofnun Suðurnesja, Heilbrigðisstofnun Suðurlands, Heilbrigðisstofnun Vesturlands á Akranesi, Læknavaktin og Sjúkrahúsið á Akureyri hafa samþykkt að veita aukna þjónustu, í samráði við starfsfólk fæðingarþjónustu Landspítalans, að því er kemur fram í tilkynningu frá spítalanum.
Athugasemdir