Fjöldi fólks mótmælti á Austurvelli og fyrir utan bandaríska sendiráðið á Laufásvegi í gær. Ástæðan er sú stefna bandarískra stjórnvalda að skilja börn hælisleitenda frá foreldrum sínum við landamæri Mexíkó og halda þeim í þar til gerðum búðum.
„Það er oft ástæða til að mótmæla fyrir hönd hælisleitenda og flóttafólks en þegar börnum er stungið í fangelsi þá stöðvast hjólin og fólk segir: hingað og ekki lengra!“ skrifar Dóra Magnúsdóttir, ein skipuleggjenda, á Facebook-viðburð mótmælanna.
Rúmlega 6.500 undirskriftir Íslendinga hafa safnast á vefnum Change.org, þar sem stefnunni er mótmæli. „Varðhald og aðskilnaður barna frá fjölskyldum sínum er mikið áfall sem getur sett börn í mjög viðkvæma stöðu gagnvart misnotkun og ofbeldi og leitt til áfallastreitu sem geti haft áhrif á þroska barna til langframa,“ segir á vefnum.
Stefnt er að því að afhenda Guðlaugi Þór Þórðarsyni utanríkisráðherra listann, en hvorki utanríkisráðherra né Katrín Jakobsdóttir forsætisráðherra svöruðu fyrirspurnum mótmælenda. Að sögn mótmælenda náðu þau aðeins í Áslaugu Örnu Sigurbjörnsdóttur, formann utanríkismálanefndar Alþingis, en hún er stödd erlendis.
Breytt stefna en óljóst með börnin
Donald Trump Bandaríkjaforseti skrifaði á miðvikudag undir tilskipun um að börn og foreldrar verði ekki lengur aðskilin með þessum hætti. Samkvæmt New York Times er óljóst hvort eitthvað verði gert til að hjálpa þeim rúmlega 2300 börnum sem nú þegar hafa verið aðskilin frá foreldrum sínum. Foreldrar þeirra eru enn í haldi á meðan gengið verður frá hælisumsóknum þeirra.
Nicole Leigh Mosty, fyrrverandi þingmaður Bjartrar framtíðar, flutti ræðu á ensku fyrir hönd Samtaka kvenna af erlendum uppruna. „Ég stend hér sem barnabarnabarn ekki eins, heldur þriggja ólöglegra innflytjenda sem smyglað var inn í Bandaríkin á barnsaldri,“ sagði Nicole, í þýðingu blaðamanns. „Í þá daga var sterk siðferðisleg forysta, þar sem markmiðið var að vernda börn og mannréttindi. Að lyfta upp þjóð með því að bjóða lausn á ofríki heimsins með því að bæta stöðu þeirra sem sættu ofríki.“
Mótmæli
Boðað til skyndimótmæla við utanríkisráðuneytið vegna árása á Íran
Leikstjóri verðlaunakvikmyndar neitaði að taka við friðarverðlaunum
Fréttamaðurinn Don Lemon handtekinn vegna mótmæla gegn ICE
Rithöfundar og fræðimenn þrýsta á bresk yfirvöld vegna hungurverkfallsfanga
Ungur mótmælandi í Íran verður tekinn af lífi
Athugasemdir