Ásmundur Friðriksson, þingmaður Sjálfstæðisflokks og 2. varaformaður velferðarnefndar Alþingis, segir það vera alvarlegt mál að tölvupóstur sem hann sendi óvart á fjölda þingmanna hafi lekið í Stundina. Hann sagðist ekki hafa miklar mætur á Stundinnií ræðu sinni á Alþingi í dag.

Málið snýr að umfjöllun Stundarinnar um þrýsting sem Bragi Guðbrandsson, frambjóðandi Íslands til Barnaréttarnefndar Sameinuðu þjóðanna, beitti barnavernd Hafnarfjarðar af samúð við fjölskyldu manns sem hafði skömmu áður verið tilkynntur til lögreglu vegna gruns um kynferðisbrot auk þess sem tilvísunarbréf hafði verið sent Barnahúsi.

Ásmundur sendi óvart póst á velferðarnefnd, forseta Alþingis, ráðherra og þingflokk Pírata með því að ýta á „reply all“, samkvæmt Mbl.is. Upphaflegi pósturinn var frá Halldóru Mogensen, formanni velferðarnefndar og þingmanni Pírata, þar sem tilkynnt var um fund velferðarnefndar Alþingis síðastliðinn mánudagi þar sem fjallað var um málið. Svar Ásmundar var „Sæl. Ég verð ekki á þessum fundi og ég les ekki Stundina, en er það fjölmiðill sem fólk tekur mark á aðrir en Píratar. Bkv Ási Friðriks.“

Segir upplýsingar úr þinginu leka í Stundina

„Undanfarna daga hefur trúnaður verið til umræðu hér í þinginu,“ sagði Ásmundur undir liðnum „störf þingsins“ á Alþingi í dag. „Trúnaður þingmanna, milli þingmanna. Trúnaður í störfum okkar. Það er mikilvægt að í starfi þingmannsins sé trúnaður haldinn og þær reglur sem gilda, hvernig farið er með tölvupósta og annað slíkt á milli okkar hér í þingsal, milli okkar í þingnefndum. Það er alvarlegt mál að ég sendi tölvupóst sem var eftir örfáar klukkustundir kominn í fjölmiðil sem ég hef ekki miklar mætur á. Það sýnir að einhver af þeim sem fengu þennan tölvupóst hefur lekið honum í viðkomandi fjölmiðil.“

„Það er alvarlegt mál að ég sendi tölvupóst sem var eftir örfáar klukkustundir kominn í fjölmiðil sem ég hef ekki miklar mætur á“

Þá sagði Ásmundur þingmenn hafa mismunandi skoðanir á hlutunum, en verða að treysta því að það sem þeir segi og sendi sín á milli rati ekki beint í fjölmiðla. „Það er með ólíkindum að við skulum ekki geta treyst því að skilaboð okkar á milli fari eingöngu í þann farveg sem þau eiga að fara,“ sagði Ásmundur. „Ég hef áður orðið var við að upplýsingar úr þinginu fari í þennan fjölmiðil. Við munum eftir leka í eftirlitsnefndinni hér fyrir nokkrum misserum. Ég held að virðing þingsins verði að aukast.“