Fullyrðir ranglega að Stundin kalli sig „kunningja“ Braga

Prestur og faðir málsaðila segir umræðuna um afskipti Braga Guðbrandssonar drifna áfram af heift: „Hættið að nota saklaus börn sem skotfæri í ljótum leik“

28. apríl 2018 · 18:25

Ritstjórn

ritstjorn@heimildin.is

Prestur og faðir málsaðila í barnaverndarmáli sem Stundin fjallaði um með ítarlegum hætti í gær vísar því alfarið á bug að hann sé „kunningi“ Braga Guðbrandssonar.

Yfirlýsingin í heild:

Fjölmiðilinn Stundin og þingflokkur Pírata hafa slegið því upp að ég sé kunningi Braga Guðbrandssonar forstjóra Barnaverndarstofu og að hann hafi vegna þess kunningsskapar haft einhvern óeðlileg afskipti af barnaverndarnefnd Hafnarfjarðar og meðferð þess á máli um umgengni sonardætra minna.
Hið rétta er hins vegar að barnaverndaryfirvöld hafa aldrei tálmað eða takmarkað umgengni sonar míns við dætur sínar, hvorki á grundvelli meints gruns um kynferðisbrot eða af öðrum ástæðum. Það var þannig aldrei möguleiki að neinn maður, kunningi minn eða ekki, gæti haft áhrif á ákvarðanatöku þeirra um slíka hluti, þar sem barnaverndarnefnd Hafnarfjarðar hefur ekki að mér vitandi haft til meðferðar mál þar sem tekin var ákvörðun um umgengni sonar míns við dætur sínar.

Vegna ásakanna sem stafa frá barnsmóður sonar míns og fjölskyldu hennar hefur barnaverndarnefnd óskað eftir rannsókn lögreglu og Barnahúss. Slík rannsókn fór fram og bendir ekkert til að sonur minn hafi brotið gegn dætrum sínum eða nokkrum öðrum. Ef talið væru einhverjar líkur á því að börnum stæði hætta af honum hafa barnaverndaryfirvöld allar valdheimildir til að takmarka umgengni hans við dætur sínar eða láta það fara fram undir eftirliti. Það hafa þau ekki gert, enda ítarlegar rannsóknir aldrei gefið tilefni til þess.

Ég leitaði til Barnaverndarstofu með formlega kvörtun um starfshætti barnaverndarnefndar Hafnarfjarðar, þar sem barnsmóðir sonar míns hélt því fram að hún gæti ekki staðið við umgengnissamkomulag vegna þess að barnaverndarnefnd heimilaði ekki umgengni. Hvorki, sonur minn, lögmaður hans né ég gátu fengið svör frá barnaverndarnefnd um hvaðan þessi fullyrðing væri komin og hvort í gangi væri eitthvað mál sem gæti staðið í vegi fyrir umgengni.

Þetta gerði ég þar sem eiginkona mín var þá dauðvona og þráði það að geta hitt barnabörn sín síðustu jólin sem hún lifði. Ég hafði samband við alla yfirmenn sem mér hugkvæmdust hjá stofnunum barnaverndaryfirvalda og reyndi að fá svör. Þá óskaði ég eftir því að þeir beittu sér til að hafa milligöngu við barnsmóður sonar míns og fá hana með einhverjum hætti til að leyfa ömmu barnanna að kveðja þær.

Ég er ekki ‚kunningi‘ Braga Guðbrandssonar og hann hefur að mér vitandi aldrei gengið minna erinda. Af faglegum ástæðum hef ég haft samskipti við hann á árum áður, þegar ég starfaði við barnavernd, en það eru sennilega yfir þrjátíu ár síðan ég hafði slík samskipti við hann. Ég hef hitt Braga einu sinni á ævinni, einhvern tíman á árunum 1981-1986, þegar ég var formaður barnaverndarnefndar og hann starfaði hjá Kópavogsbæ. Það er allur kunningsskapur okkar.

Ég bið vinsamlegast fjölmiðla, þingmenn og almenning að leyfa ekki heift og óbilgirni að særa fleiri. Hættið að nota saklaus börn sem skotfæri í ljótum leik stjórnmála- og embættismanna. Hversu mikilvægt sem þið teljið það að koma höggi á andstæðing, munið að það er raunverulegt fólk á bak við trúnaðargögnin sem þið fenguð einhvern til að leka. Og að sá sem lekur trúnaðargögnum velur hverju er lekið úr samhengi og hvaða ósannindum er hvíslað með.

Sakar hann Stundina um að hafa kallað sig kunningja Braga en í umfjöllun Stundarinnar kemur hvergi fram að þeir Bragi séu kunningjar.

Hins vegar er haft eftir prestinum sjálfum að það sé „enginn kunningsskapur“ milli þeirra en hann sé „málkunnugur“ Braga. Yfirlýsingin er send undir yfirskriftinni „Yfirlýsing ‚kunningja‘ Braga Guðbrandssonar“ og er sendandi titlaður sem prestur og fyrrverandi formaður barnaverndarnefndar.

Maðurinn segir barnaverndaryfirvöld aldrei hafa tálmað eða takmarkað umgengni sonar síns við dætur sínar.

Líkt og Stundin greindi frá í gær ráðlagði hins vegar barnaverndarnefnd Hafnarfjarðar móðurinni að tryggja að stúlkurnar væru í „öruggu skjóli“ meðan málið væri kannað. Síðar átti Sýslumaðurinn á höfuðborgarsvæðinu eftir að kveða upp dagsektarúrskurð gegn móðurinni þar sem vitnað var í tölvupóstssamskipti Braga Guðbrandssonar og prestsins, en dómsmálaráðuneytið felldi úrskurðinn úr gildi, meðal annars á þeim grundvelli að meint misnotkun föður væri enn til skoðunar.

„Vegna ásakanna sem stafa frá barnsmóður sonar míns og fjölskyldu hennar hefur barnaverndarnefnd óskað eftir rannsókn lögreglu og Barnahúss. Slík rannsókn fór fram og bendir ekkert til að sonur minn hafi brotið gegn dætrum sínum eða nokkrum öðrum,“ segir í yfirlýsingu afans.

Eins og fram kom í frétt Stundarinnar bíður lögreglan þess að Barnahús skili skýrslu um könnunarviðtöl við stúlkurnar. Barnahús bíður hins vegar eftir því að meðferð stúlknanna hjá listmeðferðarfræðingi ljúki, en faðirinn og afinn telja að listmeðferðarfræðingurinn hafi ekki unnið faglega í málinu.

Barnahús er á öðru máli og hefur stofnunin greint barnaverndarnefnd Hafnarfjarðar frá því að upplýsingar úr listmeðferðarviðtölunum séu metnar trúverðugar.

„Stúlkurnar eru því áfram í listmeðferð og sendi listmeðferðarfræðingur nýja skýrslu í apríl sl. þar sem fram koma sterkar vísbendingar um kynferðislega misnotkun föður,“ segir í einu af þeim skjölum sem Stundin hefur undir höndum.

Afinn segir í yfirlýsingu sinni að ef „talið væru einhverjar líkur á því að börnum stæði hætta af honum [hefðu] barnaverndaryfirvöld allar valdheimildir til að takmarka umgengni hans við dætur sínar eða láta það fara fram undir eftirliti. Það hafa þau ekki gert, enda ítarlegar rannsóknir aldrei gefið tilefni til þess.“

Hann skorar á fjölmiðla, þingmenn og almenning að leyfa ekki heift og óbilgirni að særa fleiri.

„Hættið að nota saklaus börn sem skotfæri í ljótum leik stjórnmála- og embættismanna,“ segir hann og bætir því við að „sá sem lekur trúnaðargögnum velur hverju er lekið úr samhengi og hvaða ósannindum er hvíslað með“.

Fréttaflutningur Stundarinnar byggir að mestu á gögnum sem hafa átt viðkomu hjá Barnaverndarnefnd Hafnarfjarðar, Barnaverndarstofu, Sýslumanninum á höfuðborgarsvæðinu, dómsmálaráðuneytinu og velferðar-ráðuneytinu auk þess sem rætt hefur verið við málsaðila, föðurinn og Braga Guðbrandsson.