Sigurlaug Hreinsdóttir, móðir Birnu Brjánsdóttur, birtir ljóð til minningar um dóttur sína á Facebook í dag.

Birna fannst látin, 20 ára að aldri, við Selvogsvita sunnudaginn 22. janúar. Hennar hafði þá verið saknað í rúma viku og umfangsmikil leit björgunarsveita staðið yfir.

Eftir líkfundinn má segja að íslenska þjóðin hafi sameinast í sorg. Þúsundir söfnuðust saman í miðbæ Reykjavíkur og minntust Birnu auk þess sem kveikt var á kertum til minningar um hana á Grænlandi og í Færeyjum. Þann 29. september var svo grænlenskur maður dæmdur í 19 ára fangelsi fyrir morðið á Birnu í Héraðsdómi Reykjaness.

Birnu er minnst sem skapandi og glaðbeittrar ungrar konu sem var hugmyndarík, skemmtileg en um leið látlaus, einlæg og trúði á það góða í fólki.

Móðir hennar birti ljóð til dóttur sinnar í dag og gaf Stundinni leyfi til að birta það hér á vefnum ásamt fermingarmynd af Birnu.

Mynd: Af Facebook-síðu Sigurlaugar, móður Birnu

Ástin mín Birna

Tíminn æðir á móti mér ... þó þú sért farin ástin mín
og ég stend bara og bið hann að stoppa ... hann hlustar ekki
og hann veður yfir mig eins og flóð
svo koma dagar, eins og afmæli og jól ... og þú ert ekki hérna
Núna er tíminn um þig

Stjörnurnar eru þarna ennþá ... þó þú sért farin ástin mín
og ég stend bara og bið þær að fara ... þær hlusta ekki
og skína áfram eins og ofbirta
svo koma norðurljósin og máninn ... og þú ert ekki hérna
Núna eru stjörnurnar um þig

Fuglarnir syngja ennþá ... þó þú sért farin ástin mín
og ég stend bara og bið þá að þegja ... þeir hlusta ekki
og syngja eins og tómarúm í loftinu
svo fljúga þeir áfram og yfir allt ... og þú ert ekki hérna
Núna er fuglasöngurinn um þig

Fólkið heldur áfram að hlæja ... þó þú sért farin ástin mín
og ég stend bara og bið það að hætta ... það hlustar ekki
og hlær eins og dynjandi hjartsláttur
eins og allt sé gott ... og þú ert ekki hérna
Núna er hjartslátturinn fyrir þig

Minningin um þig dvelur í hjartanu, tímanum, himninum, fuglasöngnum og hlátrinum