Ungverskir þingmenn samþykktu í dag Andras Baka, fyrrverandi forseta hæstaréttar, sem næsta þjóðhöfðingja landsins. Baka hefur verið gagnrýninn á Viktor Orban, fyrrverandi forsætisráðherra landsins, og var rekinn á valdatíma forsætisráðherrans fyrrverandi.

Embætti forseta losnaði í síðasta mánuði eftir umdeilda brottvikningu fyrri forseta, bandamanns Orbans. Þær breytingar voru hluti af aðgerðum Peter Magyar, forsætisráðherra sem velti Orban úr stóli í síðustu þingkosningum, sem eiga að miða að því að losa um langvarandi tök forvera síns á ríkisstofnunum.

Þingið, þar sem stjórnarflokkurinn Tisza hefur tvo-þriðju hluta meirihluta, kaus Baka – sem starfaði í 17 ár sem dómari við Mannréttindadómstól Evrópu (MDE) – með 140 atkvæðum gegn sex.

Tisza-flokkurinn tilnefndi Baka, 73 ára, á laugardag í embættið, sem er að mestu leyti táknrænt.

Magyar sagði að líf Baka væri „dæmi um skuldbindingu við lýðræðislegt réttarríki og stjórnarskrárbundnar meginreglur“ þar sem þetta Mið-Evrópuland þyrfti að „leiða aftur á braut réttarríkisins og stjórnskipulegrar stjórnsýslu“. …